ਸੇਵਾਮੁਕਤ ਕਰਨਲ ਨਾਲ ਸਵਾ ਚਾਰ ਲੱਖ ਦੀ ਠੱਗੀ ਮਾਰੀ

ਅੰਬਾਲਾ (ਨਿੱਜੀ ਪੱਤਰ ਪ੍ਰੇਰਕ): ਸਾਈਬਰ ਠੱਗਾਂ ਨੇ ਇੱਥੋਂ ਦੀ ਡਿਫੈਂਸ ਕਲੋਨੀ ਵਿਚ ਰਹਿ ਰਹੇ ਸੇਵਾਮੁਕਤ ਕਰਨਲ ਨੂੰ ਬਿਜਲੀ ਬਿਲ ਨਾ ਭਰੇ ਜਾਣ ਦਾ ਸੰਦੇਸ਼ ਭੇਜ ਕੇ ਉਸ ਦੇ ਬੈਂਕ ਖਾਤੇ ਵਿਚੋਂ ਸਵਾ ਚਾਰ ਲੱਖ ਰੁਪਏ ਠੱਗ ਲਏ। ਕਰਨਲ ਦੀ ਸ਼ਿਕਾਇਤ ’ਤੇ ਪੁਲੀਸ ਨੇ ਸਾਢੇ ਚਾਰ ਮਹੀਨਿਆਂ ਬਾਅਦ ਹੁਣ ਐੱਫਆਈਆਰ ਦਰਜ ਕੀਤੀ ਹੈ। ਸੇਵਾਮੁਕਤ ਕਰਨਲ ਅਮਰਪਾਲ ਸਿੰਘ ਨੇ ਦੱਸਿਆ ਕਿ 20 ਫਰਵਰੀ ਨੂੰ ਉਸ ਦੇ ਫੋਨ ’ਤੇ ਸੁਨੇਹਾ ਆਇਆ ਕਿ ਤੁਸੀਂ ਆਪਣੇ ਘਰ ਦਾ ਬਿਜਲੀ ਦਾ ਬਿਲ ਨਹੀਂ ਭਰਿਆ। ਸਾਈਬਰ ਠੱਗ ਨੇ ਉਸ ਦੇ ਫੋਨ ’ਤੇ ਓਟੀਪੀ ਭੇਜਿਆ। ਉਸ ਨੇ ਜਿਉਂ ਹੀ ਓਟੀਪੀ ਸ਼ੇਅਰ ਕੀਤਾ ਉਸ ਦੇ ਖਾਤੇ ਵਿੱਚੋਂ 4 ਲੱਖ 22 ਹਜ਼ਾਰ 10 ਰੁਪਏ ਨਿਕਲ ਗਏ। ਉਸ ਨੇ ਸਟੇਟ ਬੈਂਕ ਆਫ ਇੰਡੀਆ ਦੀ ਸ਼ਾਖ਼ਾ ਪਹੁੰਚ ਕੇ ਪਹਿਲਾਂ ਖਾਤਾ ਬੰਦ ਕਰਵਾਇਆ ਮਗਰੋਂ ਥਾਣਾ ਪੰਜੋਖਰਾ ਵਿਚ ਉਦੋਂ ਹੀ ਸ਼ਿਕਾਇਤ ਦੇ ਦਿੱਤੀ ਸੀ ਪਰ ਪੁਲੀਸ ਨੇ ਹੁਣ ਕੇਸ ਦਰਜ ਕਰ ਕੇ ਜਾਂਚ ਸ਼ੁਰੂ ਕੀਤੀ ਹੈ।