ਸੀਪੀਐੱਮ ਅਤੇ ਸੀਪੀਆਈ ਦੇ ਵਫ਼ਦ ਵੱਲੋਂ ਹਿੰਸਾਗ੍ਰਸਤ ਮਨੀਪੁਰ ਦਾ ਦੌਰਾ

ਨਵੀਂ ਦਿੱਲੀ, 7 ਜੁਲਾਈ
ਸੀਪੀਆਈ ਦੇ ਸੰਸਦ ਮੈਂਬਰ ਬਿਨੋਏ ਵਿਸ਼ਵਮ ਨੇ ਦੋਸ਼ ਲਾਇਆ ਹੈ ਕਿ ਭਾਜਪਾ ਨੇ ਮਨੀਪੁਰ ਦੇ ਲੋਕਾਂ ਨੂੰ ਨਾਕਾਮ ਕਰ ਕੇ ਉਨ੍ਹਾਂ ਨੂੰ ਆਪਣੇ ਹੀ ਮੁਲਕ ’ਚ ਸ਼ਰਨਾਰਥੀ ਬਣਨ ਲਈ ਮਜਬੂਰ ਕਰ ਦਿੱਤਾ ਹੈ। ਵਿਸ਼ਵਮ ਮਨੀਪੁਰ ਦੇ ਦੌਰੇ ’ਤੇ ਗਏ ਸੀਪੀਐੱਮ ਅਤੇ ਸੀਪੀਆਈ ਦੇ ਪੰਜ ਮੈਂਬਰੀ ਵਫ਼ਦ ਦਾ ਹਿੱਸਾ ਹਨ। ਇਹ ਵਫ਼ਦ ਹਿੰਸਾਗ੍ਰਸਤ ਸੂਬੇ ਦੇ ਲੋਕਾਂ ਨਾਲ ਇਕਜੁੱਟਤਾ ਦਿਖਾਉਣ ਲਈ ਉਥੇ ਗਿਆ ਹੈ। ਇਕ ਸਾਂਝੇ ਬਿਆਨ ’ਚ ਪਾਰਟੀਆਂ ਨੇ ਕਿਹਾ ਕਿ ਡਬਲ ਇੰਜਣ ਸਰਕਾਰ ਰਾਹੀਂ ਵਧੀਆ ਰਾਜ ਚਲਾਉਣ ਦੇ ਕੀਤੇ ਜਾ ਰਹੇ ਦਾਅਵਿਆਂ ਦਾ ਪਰਦਾਫਾਸ਼ ਹੋ ਗਿਆ ਹੈ। ਵਿਸ਼ਵਮ ਨੇ ਕਿਹਾ,‘‘ਮਨੀਪੁਰ ’ਚ ਲੋਕਾਂ ਨੂੰ ਆਪਣੇ ਮੁਲਕ ’ਚ ਹੀ ਸ਼ਰਨਾਰਥੀ ਬਣਨ ਲਈ ਮਜਬੂਰ ਕਰ ਦਿੱਤਾ ਗਿਆ। ਕੈਂਪਾਂ ’ਚ ਲੋਕਾਂ ਨੇ ਸਾਡੇ ਵਫ਼ਦ ਨੂੰ ਹਾਕਮਾਂ ਦੀ ‘ਪਾੜੋ ਅਤੇ ਰਾਜ ਕਰੋ’ ਨੀਤੀ ਬਾਰੇ ਦੱਸਿਆ। ਆਮ ਆਦਮੀ ਮੁਤਾਬਕ ਭਾਜਪਾ ਨੇ ਉਨ੍ਹਾਂ ਨੂੰ ਨਾਕਾਮ ਕਰ ਦਿੱਤਾ ਹੈ। ਭਾਜਪਾ ਨੂੰ ਇਸ ਵਿਸ਼ਵਾਸਘਾਤ ਦੀ ਕੀਮਤ ਚੁਕਾਉਣੀ ਪਵੇਗੀ।’’ ਵਫ਼ਦ ’ਚ ਸੀਪੀਐੱਮ ਦੇ ਰਾਜ ਸਭਾ ਮੈਂਬਰ ਵਿਕਾਸ ਰੰਜਨ ਭੱਟਾਚਾਰੀਆ ਅਤੇ ਜੌਹਨ ਬ੍ਰਿਟਾਸ, ਸੀਪੀਆਈ ਦੇ ਰਾਜ ਸਭਾ ਮੈਂਬਰ ਵਿਸ਼ਵਮ ਤੇ ਸੰਦੋਸ਼ ਕੁਮਾਰ ਪੀ ਅਤੇ ਸੀਪੀਆਈ ਦੇ ਲੋਕ ਸਭਾ ਮੈਂਬਰ ਕੇ ਸੁੱਬਾ ਰਯਾਨ ਸ਼ਾਮਲ ਹਨ। ਖੱਬੇ ਪੱਖੀ ਆਗੂਆਂ ਵੱਲੋਂ ਚੂਰਾਚਾਂਦਪੁਰ ਅਤੇ ਇੰਫਾਲ ਵਾਦੀ ’ਚ ਸਾਰੇ ਭਾਈਚਾਰਿਆਂ ਦੇ ਲੋਕਾਂ ਨਾਲ ਮੁਲਾਕਾਤ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਇਸ ਤੋਂ ਪਹਿਲਾਂ ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੇ ਪਿਛਲੇ ਮਹੀਨੇ ਦੋ ਦਿਨਾਂ ਮਨੀਪੁਰ ਦਾ ਦੌਰਾ ਕੀਤਾ ਸੀ। -ਪੀਟੀਆਈ