ਸ਼ਾਹਬਾਦ ’ਚ ਹੜ੍ਹ ਦੇ ਪਾਣੀ ’ਚੋਂ ਲਾਸ਼ ਮਿਲੀ

ਸ਼ਾਹਬਾਦ ਮਾਰਕੰਡਾ (ਪੱਤਰ ਪ੍ਰੇਰਕ): ਸ਼ਾਹਬਾਦ ਦੀ ਗਣਪਤੀ ਕਲੋਨੀ ਵਿਚ ਹੜ੍ਹ ਦੇ ਪਾਣੀ ’ਚੋਂ ਨਗਨ ਅਵਸਥਾ ਵਿਚ ਤੈਰਦੀ ਇਕ ਲਾਸ਼ ਮਿਲੀ ਹੈ। ਉਥੋਂ ਲੰਘ ਰਹੇ ਲੋਕਾਂ ਨੇ ਇਸ ਦੀ ਸੂਚਨਾ ਪੁਲੀਸ ਨੂੰ ਦਿੱਤੀ। ਹੁੱਡਾ ਚੌਕੀ ਇੰਚਾਰਜ ਬਲਬੀਰ ਵਾਲੀਆ ਨੇ ਮੌਕੇ ’ਤੇ ਪਹੁੰਚ ਕੇ ਸਥਿਤੀ ਦਾ ਜਾਇਜ਼ਾ ਲਿਆ ਅਤੇ ਹੈਲਪਰਜ਼ ਦੀ ਟੀਮ ਨੂੰ ਸੂਚਿਤ ਕੀਤਾ। ਹੈਲਪਰਜ਼ ਦੇ ਪ੍ਰਧਾਨ ਤਿਲਕ ਰਾਜ ਅਗਰਵਾਲ ਤੇ ਇੰਦਰ ਬਤਰਾ ਦੀ ਅਗਵਾਈ ਵਿਚ ਟੀਮ ਮੌਕੇ ’ਤੇ ਪੁੱਜੀ। ਇਸ ਮੌਕੇ ਤਿਲਕ ਰਾਜ ਨੇ ਕਰੀਬ ਸਾਢੇ ਚਾਰ ਫੁੱਟ ਪਾਣੀ ਦੇ ਤੇਜ਼ ਵਹਾਅ ’ਚ ਤੈਰਦੀ ਆ ਰਹੀ ਲਾਸ਼ ਨੂੰ ਰੱਸੀ ਨਾਲ ਬੰਨ੍ਹ ਕੇ ਬਾਹਰ ਖਿੱਚਿਆ ਤੇ ਪੁਲੀਸ ਦੀ ਮਦਦ ਨਾਲ ਲਾਸ਼ ਨੂੰ ਸਰਕਾਰੀ ਹਸਪਤਾਲ ਲਿਆਂਦਾ ਗਿਆ। ਪੁਲੀਸ ਲਾਸ਼ ਦੀ ਪਛਾਣ ਕਰਨ ਦਾ ਯਤਨ ਕਰ ਰਹੀ ਹੈ ਪਰ ਖਬਰ ਲਿਖੇ ਜਾਣ ਤੱਕ ਪਛਾਣ ਨਹੀਂ ਸੀ ਹੋ ਸਕੀ।