ਟਰਾਲੀ ਦੀ ਲਪੇਟ ’ਚ ਆਉਣ ਕਾਰਨ ਬੱਚੇ ਦੀ ਮੌਤ

ਪੱਤਰ ਪ੍ਰੇਰਕ
ਮਾਛੀਵਾੜਾ, 3 ਨਵੰਬਰ
ਨੇੜਲੇ ਪਿੰਡ ਸਹਿਬਾਜ਼ਪੁਰ ਨੇੜੇ ਅੱਜ ਝੋਨੇ ਨਾਲ ਭਰੀ ਟਰਾਲੀ ਹੇਠਾਂ ਆਉਣ ਕਾਰਨ ਅੱਠ ਸਾਲਾਂ ਬੱਚੇ ਦੀ ਮੌਤ ਹੋ ਗਈ। ਮੰਡ ਸੁੱਖੇਵਾਲ ਦੀ ਵਸਨੀਕ ਸੁਮਨ ਆਪਣੇ 8 ਸਾਲਾਂ ਬੱਚੇ ਹਰਜੋਤ ਸਿੰਘ ਤੇ ਆਪਣੀ ਬੱਚੀ ਨਾਲ ਮਾਛੀਵਾੜਾ ਵੱਲ ਆ ਰਹੀ ਸੀ। ਇਸੇ ਦੌਰਾਨ ਰਸਤੇ ਵਿੱਚ ਉਸ ਨੇ ਮੋਟਰਸਾਈਕਲ ਸਵਾਰ ਤੋਂ ਲਿਫਟ ਲੈ ਲਈ। ਮੋਟਰਸਾਈਕਲ ਸਵਾਰ ਜਦੋਂ ਸੁਮਨ ਤੇ ਦੋਵੇਂ ਬੱਚਿਆਂ ਨੂੰ ਲੈ ਕੇ ਪਿੰਡ ਸਹਿਬਾਜ਼ਪੁਰ ਨੇੜੇ ਰਸਤੇ ਵਿੱਚ ਜਾ ਰਹੀ ਝੋਨੇ ਨਾਲ ਭਰੀ ਟਰੈਕਟਰ-ਟਰਾਲੀ ਨੂੰ ਕਰਾਸ ਕਰਨ ਲੱਗਾ ਤਾਂ ਹਾਦਸਾ ਵਾਪਰ ਗਿਆ। ਹਰਜੋਤ ਸਿੰਘ ਮੋਟਰਸਾਈਕਲ ਤੋਂ ਡਿੱਗ ਕੇ ਟਰਾਲੀ ਦੀ ਲਪੇਟ ਵਿੱਚ ਆ ਗਿਆ ਅਤੇ ਉਸ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਪੁਲੀਸ ਨੇ ਟਰੈਕਟਰ-ਟਰਾਲੀ ਨੂੰ ਜ਼ਬਤ ਕਰ ਲਿਆ ਹੈ।