ਕਰੋੜਾਂ ਦੀ ਠੱਗੀ ਦੇ ਦੋਸ਼ ਹੇਠ ਪਤੀ-ਪਤਨੀ ਖ਼ਿਲਾਫ਼ ਕੇਸ ਦਰਜ

ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 17 ਅਗਸਤ
ਥਾਣਾ ਡੇਹਲੋਂ ਦੀ ਪੁਲੀਸ ਨੇ ਵਪਾਰ ਦੇ ਮਾਮਲੇ ਵਿੱਚ ਕਰੋੜਾਂ ਰੁਪਏ ਦੀ ਠੱਗੀ ਕਰਨ ਦੇ ਦੋਸ਼ ਤਹਿਤ ਪਤੀ ਪਤਨੀ ਖ਼ਿਲਾਫ਼ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਹੈ। ਇਸ ਸਬੰਧੀ ਡੈਲਟਾ ਸਿਟੀ ਕਾਹਲੋਂ ਹੋਮਜ ਪਿੰਡ ਰਣੀਆਂ ਵਾਸੀ ਬਲਜਿੰਦਰ ਸਿੰਘ ਕਾਹਲੋਂ ਨੇ ਦੱਸਿਆ ਕਿ ਨਿਲੇਸ਼ ਸ਼ਰਮਾ ਅਤੇ ਉਸਦੀ ਪਤਨੀ ਨੀਲਮ ਸ਼ਰਮਾ ਮੈਸ. ਮੈਟਲ ਕੈਸਟਰ ਰਾਏਪੁਰ ਨੇ ਉਸਦੀ ਫਰਮ ਤੋਂ ਮਾਲ ਖਰੀਦ ਕੇ ਉਸਦੀ ਬਣਦੀ ਪੇਮੈਂਟ 2 ਕਰੋੜ 96 ਲੱਖ 82 ਹਜ਼ਾਰ 591 ਰੁਪਏ 54 ਪੈਸੇ ਦੀ ਅਦਾਇਗੀ ਉਸ ਦੀ ਕੰਪਨੀ ਨੂੰ ਨਾ ਕਰ ਕੇ ਉਸ ਨਾਲ ਧੋਖਾਧੜੀ ਕੀਤੀ ਹੈ। ਥਾਣੇਦਾਰ ਭੁਪਿੰਦਰ ਸਿੰਘ ਨੇ ਦੱਸਿਆ ਕਿ ਪੁਲੀਸ ਵੱਲੋਂ ਕੇਸ ਦਰਜ ਕਰ ਕੇ ਕਾਰਵਾਈ ਕੀਤੀ ਜਾ ਰਹੀ ਹੈ।