ਸੜਕ ਹਾਦਸੇ ਵਿਚ ਇਕ ਹਲਾਕ, ਤਿੰਨ ਜ਼ਖ਼ਮੀ

ਰਤਨ ਸਿੰਘ ਢਿੱਲੋਂ

ਅੰਬਾਲਾ, 6 ਫਰਵਰੀ

ਅੰਬਾਲਾ ਕੈਂਟ ਜੀਟੀ ਰੋਡ ਤੇ ਆਸਾ ਰਾਮ ਪਬਲਿਕ ਸਕੂਲ ਲਾਗੇ ਟਾਟਾ ਐਸ ਅਤੇ ਅਣਪਛਾਤੇ ਵਾਹਨ ਵਿਚਕਾਰ ਹੋਈ ਟੱਕਰ ਵਿਚ ਇਕ ਨੌਜਵਾਨ ਦੀ ਮੌਤ ਹੋ ਗਈ ਜਦੋਂ ਕਿ ਤਿੰਨ ਜਣਿਆਂ ਨੂੰ ਆਦੇਸ਼ ਮੈਡੀਕਲ ਕਾਲਜ ਵਿਚ ਭਰਤੀ ਕਰਾਇਆ ਗਿਆ ਹੈ। ਤਿੰਨਾਂ ਦੀ ਹਾਲਤ ਨਾਜ਼ੁਕ ਦੱਸੀ ਜਾ ਰਹੀ ਹੈ। ਮ੍ਰਿਤਕ ਨੌਜਵਾਨ ਦੀ ਪਛਾਣ ਯੂਪੀ ਨਿਵਾਸੀ ਜੈਵੀਰ (26) ਵਜੋਂ ਹੋਈ ਹੈ।

ਜਾਣਕਾਰੀ ਅਨੁਸਾਰ ਜੈਵੀਰ ਆਪਣੇ ਸਾਥੀਆਂ ਅਨੂਪ, ਅਮਿਤਾਭ ਅਤੇ ਪੁਰਸ਼ੋਤਮ ਨਾਲ ਅੰਬਾਲਾ ਸ਼ਹਿਰ ਨਿਵਾਸੀ ਦਲੀਪ ਪੁਰੀ ਦੀ ਟਾਟਾ ਐਸ ਗੱਡੀ ਵਿਚ ਸਵਾਰ ਹੋ ਕੇ ਕਰਨਾਲ ਤੋਂ ਅੰਬਾਲਾ ਆ ਰਿਹਾ ਸੀ। ਇਹ ਚਾਰੇ ਵਿਆਹਾਂ ਵਿਚ ਕੇੈਟਰਿੰਗ (ਭੋਜਨ ਸੇਵਾਵਾਂ) ਦਾ ਕੰਮ ਕਰਦੇ ਸਨ। ਪੁਲੀਸ ਅਨੁਸਾਰ ਹਾਦਸਾ ਸਵੇਰੇ ਕਰੀਬ 4 ਵਜੇ ਵਾਪਰਿਆ ਜਿਸ ਦੀ ਸੂਚਨਾ ਉਨ੍ਹਾਂ ਨੂੰ 5 ਵਜੇ ਮਿਲੀ।ਡਾਇਲ 112 ਅਤੇ ਐਂਬੂਲੈਂਸ ਤੁਰੰਤ ਮੌਕੇ ਤੇ ਪਹੁੰਚ ਗਈਆਂ ਅਤੇ ਜ਼ਖ਼ਮੀਆਂ ਨੂੰ ਹਸਪਤਾਲ ਪਹੁੰਚਾਇਆ। ਹਾਦਸਾ ਕਿਸੇ ਅਣਪਛਾਤੇ ਵਾਹਨ ਨਾਲ ਟਕਰਾਉਣ ਕਰਕੇ ਹੋਇਆ ਜਿਸ ਵਿਚ ਜੈਵੀਰ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਅਤੇ ਉਸ ਦੇ ਤਿੰਨ ਸਾਥੀਆਂ ਅਨੂਪ, ਅਮਿਤਾਭ ਤੇ ਪੁਰਸ਼ੋਤਮ ਨੂੰ ਗੰਭੀਰ ਹਾਲਤ ਵਿਚ ਆਦੇਸ਼ ਮੈਡੀਕਲ ਕਾਲਜ ਰੈਫਰ ਕਰ ਦਿੱਤਾ ਗਿਆ। ਮੁੱਖ ਸਿਪਾਹੀ ਸਰਬਜੋਤ ਨੇ ਦੱਸਿਆ ਕਿ ਹਾਦਸੇ ਵਿਚ ਜ਼ਖ਼ਮੀ ਵਿਅਕਤੀਆਂ ਦੇ ਬਿਆਨ ਲੈਣ ਤੋਂ ਬਾਅਦ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।

ਪਿੰਡ ਢੰਗਰਾਲੀ ਕੋਲ ਤਿੰਨ ਕਾਰਾਂ ਦੀ ਟੱਕਰ

ਮੋਰਿੰਡਾ (ਪੱਤਰ ਪ੍ਰੇਰਕ): ਪਿੰਡ ਢੰਗਰਾਲੀ ਕੋਲ ਵਾਪਰੇ ਇੱਕ ਸੜਕ ਹਾਦਸੇ ਦੌਰਾਨ ਤਿੰਨ ਕਾਰਾਂ ਵਿਚ ਹੋਈ ਟੱਕਰ ਦੌਰਾਨ ਕਾਰਾਂ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ, ਪਰੰਤੂ ਕਿਸੇ ਵੀ ਤਰ੍ਹਾਂ ਦੇ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਗਿਆ। ਇੰਸਪੈਕਟਰ ਸ੍ਰੀ ਹਰਸ਼ਮੋਹਨ ਗੋਤਮ ਐਸਐਚਓ ਮੋਰਿੰਡਾ ਸਦਰ ਨੇ ਦੱਸਿਆ ਕਿ ਪੁਲੀਸ ਨੇ ਘਟਨਾ ਸਬੰਧੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।