‘ਮੈਂ ਖਿਲਾੜੀ ਤੂੰ ਅਨਾੜੀ’ ’ਤੇ ਨੱਚੇ ਸਲਮਾਨ ਅਤੇ ਅਕਸ਼ੈ

ਮੁੰਬਈ: ਲੰਮੇ ਅਰਸੇ ਮਗਰੋਂ ਬਾਲੀਵੁੱਡ ਦੀਆਂ ਕਈ ਹਿੱਟ ਜੋੜੀਆਂ ਮੁੜ ਇਕੱਠੀਆਂ ਦਿਖਾਈ ਦੇਣ ਲੱਗੀਆਂ ਹਨ। ਫਿਲਮ ‘ਪਠਾਨ’ ਵਿੱਚ ਸ਼ਾਹ ਰੁਖ ਖ਼ਾਨ ਨਾਲ ਸਲਮਾਨ ਦੀ ਜੋੜੀ ਨੂੰ ਪ੍ਰਸ਼ੰਸਕਾਂ ਵੱਲੋਂ ਮਿਲੇ ਬੇਹਿਸਾਬ ਪਿਆਰ ਮਗਰੋਂ ਹੁਣ ਸਲਮਾਨ ਤੇ ਅਕਸ਼ੈ ਕੁਮਾਰ ਵੱਲੋਂ ਇੰਸਟਾ ‘ਤੇ ਸਾਂਝੀ ਕੀਤੀ ਗਈ ਵੀਡੀਓ ਨੇ ਧੁੰਮਾਂ ਪਾਈਆਂ ਹੋਈਆਂ ਹਨ। ਇਸ ਵੀਡੀਓ ਵਿੱਚ ਦੋਵੇਂ ਅਦਾਕਾਰ ਅਕਸ਼ੈ ਕੁਮਾਰ ਦੀ ਆਉਣ ਵਾਲੀ ਫਿਲਮ ‘ਸੈਲਫ਼ੀ’ ਦੇ ਗੀਤ ‘ਮੈਂ ਖਿਲਾੜੀ ਤੂੰ ਅਨਾੜੀ’ ‘ਤੇ ਨੱਚਦੇ ਦਿਖਾਈ ਦੇ ਰਹੇ ਹਨ। ਇਹ ਫਿਲਮ 2019 ਵਿੱਚ ਆਈ ਮੱਲਿਆਲਮ ਫਿਲਮ ‘ਡਰਾਈਵਿੰਗ ਲਾਇਸੈਂਸ’ ਦੀ ਹਿੰਦੀ ਰੀਮੇਕ ਹੈ। ਇਸ ਫਿਲਮ ਵਿੱਚ ਅਕਸ਼ੈ ਨਾਲ ਇਮਰਾਨ ਹਾਸ਼ਮੀ, ਡਿਆਨਾ ਪੈਂਟੀ ਤੇ ਨੁਸਰਤ ਭਰੁਚਾ ਵੀ ਅਹਿਮ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ। ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਇਹ ਵੀਡੀਓ ਸਾਂਝੀ ਕਰਦਿਆਂ ਅਕਸ਼ੈ ਨੇ ਲਿਖਿਆ, ‘…ਤੇ ਜਦੋਂ ‘ਮੈਂ ਖਿਲਾੜੀ’ ਸਲਮਾਨ ਨੇ ਸੁਣਿਆ…ਅਗਲੇ ਹੀ ਪਲ ਉਸ ਨੇ ਨੱਚਣਾ ਸ਼ੁਰੂ ਕਰ ਦਿੱਤਾ…ਫਿਰ ਕੀ ਸੀ…ਬਸ ਧੂਮ ਮਚਾਈ।” ਇਸ ਵੀਡੀਓ ਵਿੱਚ ਸਲਮਾਨ ਨੇ ਕਾਲੇ ਰੰਗ ਦੀ ਟੀ-ਸ਼ਰਟ ਤੇ ਜੀਨ ਪਾਈ ਹੋਈ ਹੈ, ਜਦਕਿ ਅਕਸ਼ੈ ਨੇ ਨੀਲੇ ਰੰਗ ਦੀ ਟੀ-ਸ਼ਰਟ ਨਾਲ ਕਾਰਗੋ ਪੈਂਟ ਪਾਈ ਹੋਈ ਹੈ। ਜ਼ਿਕਰਯੋਗ ਹੈ ਕਿ ਪਿਛਲੀ ਵਾਰ ਦੋਵੇਂ ਅਦਾਕਾਰ 2004 ਵਿੱਚ ਆਈ ਫਿਲਮ ‘ਮੁਝਸੇ ਸ਼ਾਦੀ ਕਰੋਗੀ’ ਵਿੱਚ ਇਕੱਠੇ ਦਿਖਾਈ ਦਿੱਤੇ ਸਨ। ਰਾਜ ਮਹਿਤਾ ਵੱਲੋਂ ਨਿਰਦੇਸ਼ਿਤ ਫਿਲਮ ‘ਸੈਲਫ਼ੀ’ 24 ਫਰਵਰੀ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਕੀਤੀ ਜਾਵੇਗੀ। -ਆਈਏਐੱਨਐੱਸ