ਮਲਸੀਆਂ ’ਚ ਕਬੱਡੀ ਸਿਖਲਾਈ ਕੈਂਪ ਦਾ ਉਦਘਾਟਨ

ਪੱਤਰ ਪ੍ਰੇਰਕ
ਸ਼ਾਹਕੋਟ, 6 ਮਈ
ਮਲਸੀਆਂ ’ਚ ਕਬੱਡੀ ਸਿਖਲਾਈ ਕੈਂਪ ਦਾ ਉਦਘਾਟਨ ਕਬੱਡੀ ਦੇ ਸਾਬਕਾ ਕੌਮਾਂਤਰੀ ਖਿਡਾਰੀ ਜੋਗਿੰਦਰ ਸਿੰਘ ਸਾਦਿਕਪੁਰ ਅਤੇ ਬਿੱਟੂ ਖੀਵਾ ਵੱਲੋਂ ਕੀਤਾ ਗਿਆ। ਉਨ੍ਹਾਂ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਇਹ ਕੈਂਪ ਆਉਣ ਵਾਲੀ ਪੀੜ੍ਹੀ ਵਿੱਚ ਕਬੱਡੀ ਪ੍ਰਤੀ ਲਗਨ ਪੈਦਾ ਕਰੇਗਾ। ਇਲਾਕੇ ਵਿੱਚ ਮੁਫਤ ਸਿਖਲਾਈ ਕੈਂਪ ਲੱਗਣ ਨਾਲ ਇਲਾਕੇ ਦੇ ਕਈ ਨੌਜਵਾਨ ਪੰਜਾਬੀਆਂ ਦੀ ਮਾਂ ਖੇਡ ਕਬੱਡੀ ਨਾਲ ਜੁੜ ਕੇ ਕਬੱਡੀ ਨੂੰ ਹੋਰ ਬੁਲੰਦੀਆਂ ਤੱਕ ਪਹੁੰਚਾਉਣ ਦੇ ਸਮਰੱਥ ਬਣਨਗੇ। ਕਬੱਡੀ ਕੋਚ ਪਰਮਜੀਤ ਸਿੰਘ ਪੰਮਾ ਨੇ ਕਿਹਾ ਕਿ ਕਬੱਡੀ ਦੀ ਨਰਸਰੀ ਤਿਆਰ ਕਰਕੇ ਨੌਜਵਾਨਾਂ ਨੂੰ ਨਸ਼ਿਆਂ ਦੀ ਦਲਦਲ ਤੋਂ ਦੂਰ ਰੱਖਣਾ ਹੀ ਉਨ੍ਹਾਂ ਦੇ ਕੈਂਪ ਦਾ ਮੁੱਖ ਉਦੇਸ਼ ਹੈ। ਉਨ੍ਹਾਂ ਕਿਹਾ ਕਿ ਤਿੰਨ ਮਹੀਨੇ ਚੱਲਣ ਵਾਲੇ ਕੈਂਪ ਵਿੱਚ ਉਹ ਰੋਜ਼ਾਨਾ 100 ਖਿਡਾਰੀਆਂ ਨੂੰ ਸਿਖਲਾਈ ਦਿਆ ਕਰਨਗੇ। ਉਨ੍ਹਾਂ ਕਬੱਡੀ ਨੂੰ ਪਿਆਰ ਕਰਨ ਵਾਲੇ ਨੌਜਵਾਨਾਂ ਨੂੰ ਕੈਂਪ ਦਾ ਲਾਭ ਉਠਾਉਣ ਦੀ ਅਪੀਲ ਕੀਤੀ। ਇਸ ਮੌਕੇ ਭਿੰਦਾ ਖਹਿਰਾ, ਰਮਨ ਮੱਲ੍ਹੀਆਂ, ਮਿੰਟੂ ਨਿਮਾਜੀਪੁਰ, ਮੇਜਰ ਸਿੰਘ, ਜੋਧਾ ਮਾਣਕਪੁਰ, ਅਰਸ਼ ਬੁੱਢਣਵਾਲ, ਗੁਰਬਾਜ, ਜੱਸੀ, ਕਰਨ ਅਤੇ ਸਾਂਈ ਮਲਸੀਆਂ ਆਦਿ ਹਾਜ਼ਰ ਸਨ।