ਮਜ਼ਦੂਰ ਵੱਲੋਂ ਪਤਨੀ ਦੀ ਹੱਤਿਆ

ਪੱਤਰ ਪ੍ਰੇਰਕ
ਤਰਨ ਤਾਰਨ, 3 ਮਈ
ਝਬਾਲ ਇਲਾਕੇ ਦੇ ਪਿੰਡ ਗੱਗੋਬੁਆ ਦੇ ਭੱਠਾ ਮਜ਼ਦੂਰ ਨੇ ਆਪਣੀ ਪਤਨੀ ਦੀ ਕਥਿਤ ਤੌਰ ’ਤੇ ਕੁੱਟ-ਕੁੱਟ ਕੇ ਹੱਤਿਆ ਕਰ ਦਿੱਤੀ। ਮ੍ਰਿਤਕਾ ਦੀ ਪਛਾਣ ਰਹਿਮਾ ਵਜੋਂ ਹੋਈ ਹੈ। ਪੁਲੀਸ ਨੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਗੁਰੂ ਨਾਨਕ ਦੇਵ ਬਰਿੱਕ ਕਲਿਨ ਭੱਠਾ ਕੰਪਨੀ ਗੱਗੋਬੁਆ ਦੇ ਮਾਲਕ ਸੁਖਵੰਤ ਸਿੰਘ ਨੇ ਦੱਸਿਆ ਕਿ ਬਿਹਾਰ ਵਾਸੀ ਮੁਲਜ਼ਮ ਸਿਧਾਰਥ ਕੁਝ ਦਿਨ ਪਹਿਲਾਂ ਹੀ ਪਰਿਵਾਰ ਸਮੇਤ ਉਸ ਦੇ ਭੱਠੇ ’ਤੇ ਆ ਕੇ ਕੰਮ ਕਰਨ ਲੱਗਾ ਸੀ। ਉਸ ਦੀ ਇੱਕ ਦਸ ਸਾਲ ਲੜਕੀ ਅਤੇ ਤਿੰਨ ਸਾਲ ਦਾ ਲੜਕਾ ਹੈ। ਸਿਧਾਰਥ ਨੇ ਵੀਰਵਾਰ ਰਾਤ ਨੂੰ ਸ਼ਰਾਬ ਦੇ ਨਸ਼ੇ ਵਿੱਚ ਆਪਣੀ ਪਤਨੀ ਦੀ ਕੁੱਟਮਾਰ ਕੀਤੀ ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ| ਝਬਾਲ ਪੁਲੀਸ ਨੇ ਦੱਸਿਆ ਕਿ ਮੁਲਜ਼ਮ ਮੌਕੇ ਤੋਂ ਫਰਾਰ ਹੋ ਗਿਆ ਜਿਸ ਨੂੰ ਬਾਅਦ ਵਿੱਚ ਕਾਬੂ ਕਰ ਲਿਆ ਗਿਆ| ਇਸ ਸਬੰਧੀ ਪੁਲੀਸ ਨੇ ਬੀਐੱਨਐੱਸ ਦੀ ਦਫ਼ਾ 103 (1) ਤਹਿਤ ਕੇਸ ਦਰਜ ਕੀਤਾ ਹੈ|