ਬਟਲਾ ਹਾਊਸ ਦੇ ਵਾਸੀਆਂ ਨੂੰ ਘਰ ਢਾਹੁਣ ਦਾ ਖ਼ਤਰਾ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 2 ਜੂਨ
‘ਖਸਰਾ ਨੰਬਰ 277 ਅਤੇ 279 ’ਤੇ ਰਹਿਣ ਵਾਲੇ ਬਟਲਾ ਹਾਊਸ ਦੇ ਵਾਸੀ, ਉੱਤਰ ਪ੍ਰਦੇਸ਼ ਸਿੰਜਾਈ ਵਿਭਾਗ ਅਤੇ ਦਿੱਲੀ ਵਿਕਾਸ ਅਥਾਰਟੀ (ਡੀਡੀਏ) ਵੱਲੋਂ 26 ਮਈ ਨੂੰ ਜਾਰੀ ਕੀਤੇ ਗਏ ਨੋਟਿਸਾਂ ਤੋਂ ਬਾਅਦ ਘਰ ਢਾਹੇ ਜਾਣ ਦੇ ਖ਼ਤਰੇ ਨਾਲ ਜੂਝ ਰਹੇ ਹਨ। ਸਰਕਾਰੀ ਜ਼ਮੀਨ ’ਤੇ ਗੈਰ-ਕਾਨੂੰਨੀ ਉਸਾਰੀਆਂ ਦਾ ਹਵਾਲਾ ਦਿੰਦੇ ਹੋਏ ਨੋਟਿਸ ਵਿੱਚ 15 ਦਿਨਾਂ ਦੇ ਅੰਦਰ ਢਾਂਚਿਆਂ ਨੂੰ ਹਟਾਉਣ ਲਈ ਕਿਹਾ ਗਿਆ ਹੈ ਅਤੇ ਢਾਹੁਣ ਦੀ ਕਾਰਵਾਈ 11 ਜੂਨ ਤੋਂ ਸ਼ੁਰੂ ਹੋਵੇਗੀ। ਦੱਖਣ-ਪੂਰਬ ਦੇ ਡਿਪਟੀ ਡਾਇਰੈਕਟਰ ਵੱਲੋਂ ਜਾਰੀ ਡੀਡੀਏ ਦੇ ਨੋਟਿਸ ਵਿੱਚ ਖਸਰਾ ਨੰਬਰ 279 ਵਿੱਚ ਡੀਡੀਏ ਦੀ ਮਲਕੀਅਤ ਵਾਲੀ ਜ਼ਮੀਨ ’ਤੇ ਕਬਜ਼ੇ ਦਾ ਦੋਸ਼ ਲਗਾਇਆ ਗਿਆ ਹੈ। ਇਸੇ ਤਰ੍ਹਾਂ ਉੱਤਰ ਪ੍ਰਦੇਸ਼ ਸਿੰਜਾਈ ਵਿਭਾਗ ਦਾ ਨੋਟਿਸ, ਜਿਸ ’ਤੇ ਓਖਲਾ ਵਿੱਚ ਆਗਰਾ ਨਹਿਰ ਵਰਕਸ ਸੈਕਸ਼ਨ ਦੇ ਜ਼ਿਲ੍ਹੇਦਾਰ ਪ੍ਰਥਮ ਵੱਲੋਂ ਦਸਤਖ਼ਤ ਕੀਤੇ ਗਏ ਹਨ, ਖਿਜ਼ਰ ਬਾਬਾ ਕਲੋਨੀ, ਮੁਰਾਦੀ ਰੋਡ ਵਿੱਚ ਖਸਰਾ ਨੰਬਰ 277 ਦੀ ਜ਼ਮੀਨ ਨੂੰ ਸਿੰਜਾਈ ਵਿਭਾਗ ਦੀ ਜਾਇਦਾਦ ਦੱਸਦਾ ਹੈ ਅਤੇ ਵਸਨੀਕਾਂ ਨੂੰ ਨਿਰਧਾਰਤ ਸਮੇਂ ਦੇ ਅੰਦਰ ਅਣਅਧਿਕਾਰਤ ਘਰਾਂ ਅਤੇ ਦੁਕਾਨਾਂ ਨੂੰ ਖਾਲੀ ਕਰਨ ਦਾ ਆਦੇਸ਼ ਦਿੱਤਾ ਹੈ। ਇਸ ਸਬੰਧੀ ਪਾਲਣਾ ਨਾ ਕਰਨ ’ਤੇ ਕਾਨੂੰਨੀ ਕਾਰਵਾਈ ਦੀ ਧਮਕੀ ਦਿੱਤੀ ਗਈ ਹੈ। ਸੁਪਰੀਮ ਕੋਰਟ ਨੇ ਜਾਮੀਆ ਨਗਰ ਦੇ ਬਟਲਾ ਹਾਊਸ ਵਿੱਚ ਜਾਇਦਾਦ ਮਾਲਕਾਂ ਨੂੰ ਜਾਰੀ ਕੀਤੇ ਗਏ ਢਾਹੁਣ ਦੇ ਨੋਟਿਸ ਵਿੱਚ ਦਖ਼ਲ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਇਸ ਨੇ ਪਟੀਸ਼ਨਕਰਤਾਵਾਂ ਨੂੰ ਢੁਕਵੇਂ ਅਧਿਕਾਰੀਆਂ ਨਾਲ ਸੰਪਰਕ ਕਰਨ ਲਈ ਵੀ ਕਿਹਾ। ਬਟਲਾ ਹਾਊਸ ਵਿੱਚ ਜਾਇਦਾਦ ਦੇ ਮਾਲਕ 40 ਵਾਸੀਆਂ ਨੇ ਢਾਹੁਣ ਦੇ ਹੁਕਮ ‘ਤੇ ਰੋਕ ਲਗਾਉਣ ਦੀ ਮੰਗ ਕੀਤੀ ਸੀ।