ਨਕਲੀ ਵਰਕ ਵੀਜ਼ਾ ਏਜੰਸੀ ਦਾ ਪਰਦਾਫਾਸ਼

ਭੁਪਿੰਦਰ ਪੰਨੀਵਾਲੀਆ
ਕਾਲਾਂਵਾਲੀ, 8 ਜੂਨ
ਸਾਈਬਰ ਸੁਰੱਖਿਆ ਸ਼ਾਖਾ ਦੇ ਇੰਚਾਰਜ ਇੰਸਪੈਕਟਰ ਅਨਿਲ ਕੁਮਾਰ ਦੀ ਟੀਮ ਅਤੇ ਥਾਣਾ ਕਾਲਾਂਵਾਲੀ ਪੁਲੀਸ ਨੇ ਇੱਕ ਜਾਅਲੀ ਵਰਕ ਵੀਜ਼ਾ ਏਜੰਸੀ ਦਾ ਪਰਦਾਫਾਸ਼ ਕੀਤਾ ਹੈ ਅਤੇ ਇਸ ਧੋਖਾਧੜੀ ਦੇ ਮੁੱਖ ਸਰਗਨਾ ਸਮੇਤ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਅਤੇ ਉਨ੍ਹਾਂ ਦੇ ਕਬਜ਼ੇ ਵਿੱਚੋਂ 9 ਮੋਬਾਈਲ ਫੋਨ, ਇੱਕ ਲੈਪਟਾਪ, 26 ਵੀਜ਼ਾ ਕਾਰਡ, ਭਾਰਤ ਅਤੇ ਨੇਪਾਲ ਦੇ 22 ਪਾਸਪੋਰਟ, 2 ਜਾਅਲੀ ਸਟੈਂਪ, ਆਈਡੀਬੀਆਈ ਬੈਂਕ ਚੈੱਕ ਬੁੱਕ, ਬ੍ਰਾਡਬੈਂਡ ਕਨੈਕਸ਼ਨ ਅਤੇ 22 ਹਜ਼ਾਰ ਰੁਪਏ ਨਕਦ ਬਰਾਮਦ ਕੀਤੇ ਹਨ। ਪੁਲੀਸ ਵੱਲੋਂ ਗਿ੍ਰਫਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਮੁੱਖ ਮੁਲਜ਼ਮ ਸ਼ਾਹਬਾਜ਼ ਹੁਸੈਨ ਉਰਫ਼ ਗੋਰੰਗ ਉਰਫ਼ ਪ੍ਰਜਾਪਤੀ ਗੋਰੰਗ ਵਾਸੀ ਪਾਟਨ, ਗੁਜਰਾਤ, ਹਾਲ ਆਬਾਦ ਸੂਰਤ ਗੁਜਰਾਤ ਅਤੇ ਉਸਦੇ ਸਾਥੀ ਅਜੈ ਕੁਮਾਰ ਵਾਸੀ ਸੰਗਮ ਵਿਹਾਰ ਦੱਖਣੀ ਦਿੱਲੀ ਵਜੋਂ ਹੋਈ ਹੈ।
ਥਾਣਾ ਕਾਲਾਂਵਾਲੀ ਦੇ ਸਬ ਇੰਸਪੈਕਟਰ ਤਾਰਾਚੰਦ ਅਤੇ ਪੀਐਸਆਈ ਸਤਪਾਲ ਨੇ ਦੱਸਿਆ ਕਿ ਕਾਲਾਂਵਾਲੀ ਵਾਸੀ ਸ਼ਿਕਾਇਤਕਰਤਾ ਨੇ ਦੱਸਿਆ ਸੀ ਕਿ ਤਿੰਨ ਮਹੀਨੇ ਪਹਿਲਾਂ ਉਸਨੇ ਮਾਲਟਾ ਤੋਂ ਫਿਨਲੈਂਡ ਜਾਣ ਲਈ ਫੇਸਬੁੱਕ ’ਤੇ ਵਰਕ ਵੀਜ਼ਾ ਫਿਨਲੈਂਡ ਦੀ ਖੋਜ ਕੀਤੀ ਅਤੇ ਇੱਕ ਵਟਸਐਪ ਨੰਬਰ ਆਇਆ। ਜਿਸ ’ਤੇ ਉਸ ਨੇ ਇੱਕ ਵਟਸਐਪ ਕਾਲ ਕੀਤੀ, ਅਤੇ ਉਹ ਵਰਕ ਵੀਜ਼ਾ ਪ੍ਰਾਪਤ ਕਰਨ ਲਈ ਸਹਿਮਤ ਹੋ ਗਿਆ। ਵਰਕ ਵੀਜ਼ਾ ਪ੍ਰਾਪਤ ਕਰਨ ਦੇ ਬਦਲੇ ਉਨ੍ਹਾਂ ਨੇ ਵਟਸਐਪ ’ਤੇ ਇੱਕ ਬੈਂਕ ਖਾਤਾ ਨੰਬਰ ਭੇਜਿਆ, ਜਿਸ ’ਤੇ ਸ਼ਿਕਾਇਤਕਰਤਾ ਨੇ ਵੀਜ਼ਾ ਲਗਵਾਉਣ ਲਈ ਵਾਰੀ-ਵਾਰੀ ਦੋ ਲੱਖ ਤਰਵੰਜਾ ਹਜ਼ਾਰ ਰੁਪਏ ਭੇਜੇ। ਜਦੋਂ ਸ਼ਿਕਾਇਤਕਰਤਾ ਨੇ ਵਰਕ ਵੀਜ਼ਾ ਪ੍ਰਾਪਤ ਕਰਨ ਦੀ ਗੱਲ ਕੀਤੀ ਤਾਂ ਉਨ੍ਹਾਂ ਨੇ ਨਾ ਤਾਂ ਵਰਕ ਵੀਜ਼ਾ ਦਿੱਤਾ ਅਤੇ ਨਾ ਹੀ ਪੈਸੇ ਵਾਪਸ ਕੀਤੇ। ਜਿਸ ’ਤੇ ਕੇਸ ਦਰਜ ਕੀਤਾ ਗਿਆ ਅਤੇ ਕਾਰਵਾਈ ਸ਼ੁਰੂ ਕੀਤੀ ਗਈ। ਸਾਈਬਰ ਸੈੱਲ ਦੀ ਮਦਦ ਨਾਲ ਮੁਲਜ਼ਮ ਸ਼ਾਹਬਾਜ਼ ਹੁਸੈਨ ਉਰਫ਼ ਗੋਰੰਗ ਅਤੇ ਅਜੈ ਕੁਮਾਰ ਨੂੰ  ਕਾਬੂ ਕੀਤਾ ਗਿਆ ਹੈ।