ਤੂੜੀ ਵਾਲੀ ਟਰਾਲੀ ਕਾਰਨ ਰਾਹਗੀਰ ਪ੍ਰੇਸ਼ਾਨ

ਲਾਲੜੂ: ਅੰਬਾਲਾ ਚੰਡੀਗੜ੍ਹ ਮੁੱਖ ਮਾਰਗ ’ਤੇ ਭਾਰੀ ਟਰੈਫਿਕ ਦੇ ਚਲਦੇ ਅੱਜ ਸਵੇਰੇ 4 ਵਜੇ ਦੇ ਕਰੀਬ ਥਾਣਾ ਲਾਲੜੂ ਦੇ ਸਾਹਮਣੇ ਤੂੜੀ ਨਾਲ ਭਰੀ ਤੰਗੜ ਟਰਾਲੀ ਦੇ ਫਟ ਜਾਣ ਕਾਰਨ ਵਾਹਨ ਚਾਲਕਾਂ ਨੂੰ ਭਾਰੀ ਪ੍ਰੇਸ਼ਾਨੀ ਤੇ ਖੱਜਲ ਖੁਆਰੀ ਦਾ ਸਾਹਮਣਾ ਕਰਨਾ ਪਿਆ ਅਤੇ ਕਾਫੀ ਦੇਰ ਤੱਕ ਆਵਾਜਾਈ ’ਚ ਵਿਘਨ ਪਿਆ। ਇਸ ਕਾਰਨ ਠੰਢ ਵਿੱਚ ਲੋਕਾਂ ਨੂੰ ਘੰਟਿਆਂ ਬੱਧੀ ਆਪਣੇ ਵਾਹਨਾਂ ਵਿੱਚ ਹੀ ਇੰਤਜ਼ਾਰ ਕਰਨਾ ਪਿਆ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਟਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰਦੇ ਹੋਏ ਚੌਲਾਂ ਦੇ ਛਿਲਕੇ ਅਤੇ ਤੂੜੀ ਨਾਲ ਭਰੀਆਂ ਟਰਾਲੀਆਂ ਦੇਰ ਸਵੇਰ ਲੁਕ ਛਿਪ ਕੇ ਮੁੱਖ ਮਾਰਗ ’ਤੇ ਚੱਲਦੀਆਂ ਹਨ, ਜੋ ਆਪਣਾ ਮਾਲ ਇਲਾਕੇ ਵਿੱਚ ਲੱਗੀਆਂ ਵੱਖ-ਵੱਖ ਫੈਕਟਰੀਆਂ ਅੰਦਰ ਸਪਲਾਈ ਕਰਦੀਆਂ ਹਨ ਅਤੇ ਨਿਯਮਾਂ ਦੀ ਉਲੰਘਣਾ ਵੀ ਕਰਦੀਆਂ ਹਨ। ਅੱਜ ਸਵੇਰੇ ਵੀ ਤੰਗੜ ਟਰਾਲੀ ਦੇ ਲਾਲੜੂ ਥਾਣੇ ਦੇ ਸਾਹਮਣੇ ਮੁੱਖ ਮਾਰਗ ’ਤੇ ਫਟ ਜਾਣ ਕਾਰਨ ਕਾਫੀ ਦੇਰ ਤੱਕ ਟਰੈਫਿਕ ਜਾਮ ਰਿਹਾ। ਪੁਲੀਸ ਨੇ ਮੌਕੇ ’ਤੇ ਪਹੁੰਚ ਕੇ ਟਰਾਲੀ ਨੂੰ ਇੱਕ ਪਾਸੇ ਕਰਕੇ ਜਾਮ ਖੁਲ੍ਹਵਾਇਆ। -ਪੱਤਰ ਪ੍ਰੇਰਕ