ਤਿੰਨ ਮੇਲ ਗੱਡੀਆਂ ਦੀਆਂ ਸੇਵਾਵਾਂ 12 ਦਿਨਾਂ ਲਈ ਮੁਅੱਤਲ

ਪੱਤਰ ਪ੍ਰੇਰਕ
ਟੋਹਾਣਾ, 25 ਅਗਸਤ
ਜਾਖਲ-ਦਿੱਲੀ ਰੇਲ ਰੂੁਟ ’ਤੇ ਲੰਬੀ ਦੂਰੀ ਦੀਆਂ ਤਿੰਨ ਮੇਲ ਗੱਡੀਆਂ ਸਤੰਬਰ ਮਹੀਨੇ ਵਿੱਚ 12 ਦਿਨਾਂ ਲਈ ਮੁਅੱਤਲ ਕਰਨ ਸਬੰਧੀ ਰੇਲਵੇ ਨੇ ਸੂਚਨਾ ਜਾਰੀ ਕੀਤੀ ਹੈ। ਰੇਲਵੇ ਵੱਲੋਂ ਜਾਰੀ ਸੁਚਨਾ ਮੁਤਾਬਕ ਫਿਰੋਜ਼ਪੁਰ-ਮੁੰਬਈ ਵਿਚਕਾਰ ਚੱਲਣ ਵਾਲੀ ਪੰਜਾਬ ਮੇਲ 12137-38 ਅਪ-ਡਾਊਨ ਨੂੰ 6 ਤੋਂ 17 ਸਤੰਬਰ ਤੱਕ ਬੰਦ ਕਰ ਦਿੱਤਾ ਗਿਆ ਹੈ। ਫਿਰੋਜ਼ਪੁਰ ਤੋਂ ਛਿੰਦਵਾੜਾ ਵਿਚਕਾਰ ਚੱਲਣ ਵਾਲੀ 14623-24 ਅਪ-ਡਾਊਨ ਗੱਡੀ ਨੂੰ ਵੀ 7 ਤੋਂ 18 ਸਤੰਬਰ ਲਈ ਮੁਅੱਤਲ ਕਰ ਦਿੱਤਾ ਗਿਆ ਹੈ ਇਸ ਤੋਂ ਇਲਾਵਾ ਜੰਮੂਤਵੀ ਤੋਂ ਚੇਨਈ ਵਿਚਕਾਰ ਚੱਲਣ ਵਾਲੀ ਇਕ ਹੋਰ ਮੇਲਗੱਡੀ ਨੂੰ 30 ਅਗਸਤ ਤੋਂ 17 ਸਤੰਬਰ ਤੱਕ ਮੁਅੱਤਲ ਕਰ ਦੇਣ ’ਤੇ ਯਾਤਰਿਆਂ ਨੂੰ ਸਮੱਸਿਆਵਾਂ ਦਾ ਖ਼ਦਸ਼ਾ ਬਣ ਗਿਆ ਹੈ। ਰੇਲਵੇ ਮੁਤਾਬਕ ਪਲਵਲ ਰੇਲਵੇ ਸਟੇਸ਼ਨ ਦੇ ਇਲੈਕਟ੍ਰਾਨਿਕਸ ਪ੍ਰਣਾਲੀ ਦੀ ਮੁਰੰਮਤ ਲਈ ਇਨ੍ਹਾਂ ਗੱਡੀਆਂ ਨੂੰ ਰੱਦ ਕੀਤਾ ਗਿਆ ਹੈ।