ਤਾਜਪੁਰ ਰੋਡ ’ਤੇ ਪਾਵਰ ਗਰਿੱਡ ’ਚ ਅੱਗ ਲੱਗੀ

ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 11 ਦਸੰਬਰ

ਸਨਅਤੀ ਸ਼ਹਿਰ ਦੇ ਤਾਜਪੁਰ ਰੋਡ ਕੇਂਦਰੀ ਜੇਲ੍ਹ ਨੇੜੇ ਦੇਰ ਸ਼ਾਮ 66 ਕੇਵੀ ਪਾਵਰ ਗਰਿੱਡ ਨੂੰ ਅਚਾਨਕ ਹੀ ਅੱਗ ਲੱਗ ਗਈ, ਜਿਸ ਦੀਆਂ ਲਾਟਾਂ ਦੇਖਦੇ ਹੀ ਦੇਖਦੇ ਅਸਮਾਨ ਛੂਹਣ ਲੱਗੀਆਂ ਤੇ ਨੇੜੇ ਦੇ ਕਈ ਇਲਾਕਿਆਂ ’ਚ ਹਨੇਰਾ ਛਾ ਗਿਆ। ਅੱਗ ਲੱਗਣ ਦਾ ਕਾਰਨ ਸ਼ਾਰਟ ਸਰਕਟ ਦੱਸਿਆ ਜਾ ਰਿਹਾ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਤਾਜਪੁਰ ਰੋਡ ’ਤੇ ਕੇਂਦਰੀ ਜੇਲ੍ਹ ਨੇੜੇ ਸਥਿੱਤ 66 ਕੇਵੀ ਪਾਵਰ ਗਰਿੱਡ ’ਚ ਸ਼ਾਮ ਨੂੰ ਲਗਪਗ 6 ਵਜੇ ਅੱਗ ਲੱਗ ਗਈ, ਜਿਸ ਨੇ ਕੁੱਝ ਮਿੰਟਾਂ ਵਿੱਚ ਹੀ ਭਿਆਨਕ ਰੂਪ ਧਾਰ ਲਿਆ ਅਤੇ ਗਰਿੱਡ ਅੰਦਰ ਬਿਜਲੀ ਵਾਲੀਆਂ ਤਾਰਾਂ ਤੇ ਕਈ ਵੱਡੇ ਟਰਾਂਸਫਾਰਮਰ ਸੜ ਕੇ ਸੁਆਹ ਹੋ ਗਏ। ਅੱਗ ਲੱਗਣ ਕਾਰਨ ਇਸ ਪਾਵਰ ਗਰਿੱਡ ਨਾਲ ਸਬੰਧਤ ਕਈ ਇਲਾਕਿਆਂ ’ਚ ਹਨੇਰਾ ਛਾ ਗਿਆ। ਅੱਗ ਇੰਨੀ ਭਿਆਨਕ ਸੀ ਕਿ ਉਸਦੀਆਂ ਲਪਟਾਂ ਕਈ-ਕਈ ਕਿਲੋਮੀਟਰ ਤੋਂ ਨਜ਼ਰ ਆ ਰਹੀਆਂ ਸਨ। ਅੱਗ ਲੱਗਣ ਸਬੰਧੀ ਬਿਜਲੀ ਵਿਭਾਗ ਤੇ ਇਲਾਕੇ ਦੇ ਲੋਕਾਂ ਵੱਲੋਂ ਫਾਇਰ ਬਿਗ੍ਰੇਡ ਨੂੰ ਸੂਚਿਤ ਕੀਤਾ ਗਿਆ। ਫਾਇਰ ਬਿਗ੍ਰੇਡ ਵਿਭਾਗ ਦੇ ਆਤਿਸ਼ ਨੇ ਦੱਸਿਆ ਕਿ ਦੇਰ ਸ਼ਾਮ ਉਨ੍ਹਾਂ ਨੂੰ ਸੂਚਨਾ ਮਿਲੀ ਕਿ ਤਾਜਪੁਰ ਰੋਡ ’ਤੇ ਪਾਵਰ ਗਰਿੱਡ ’ਚ ਅੱਗ ਲੱਗ ਗਈ ਹੈ। ਉਨ੍ਹਾਂ ਤੁਰੰਤ 6 ਗੱਡੀਆਂ ਨੂੰ ਅੱਗ ਬੁਝਾਉਣ ਲਈ ਭੇਜਿਆ। ਖ਼ਬਰ ਲਿਖੇ ਜਾਣ ਤੱਕ ਅੱਗ ਕਾਬੂ ਤੋਂ ਬਾਹਰ ਸੀ, ਜਿਸ ਨੂੰ ਬੁਝਾਉਣ ਲਈ ਜਿੱਥੇ ਫਾਇਰ ਬਿਗ੍ਰੇਡ ਦੇ ਕਰਮਚਾਰੀ ਪੂਰੀ ਜੱਦੋ- ਜਹਿਦ ਕਰ ਰਹੇ ਸਨ ਉੱਥੇ ਹੀ ਨਾਲ ਲੱਗਦੇ ਰਿਹਾਇਸ਼ੀ ਇਲਾਕਿਆਂ ਦੇ ਵਸਨੀਕ ਵੀ ਸਹਿਮੇ ਹੋਏ ਦਿਖਾਈ ਦਿੱਤੇ। ਫਾਇਰ ਬਿਗ੍ਰੇਡ ਦੇ ਅਧਿਕਾਰੀ ਦੱਸਿਆ ਕਿ ਅੱਗ ਲੱਗਣ ਦਾ ਕਾਰਨ ਸ਼ਾਰਟ ਸਰਕਟ ਬਣਿਆ ਹੈ।