ਝੋਨੇ ਦੇ ਪੈਸੇ ਕਿਸੇ ਹੋਰ ਦੇ ਖਾਤੇ ’ਚ ਪਾਏ; ਖਾਤਾਧਾਰਕ ਖਿਲਾਫ਼ ਕੇਸ ਦਰਜ

ਚਰਨਜੀਤ ਸਿੰਘ ਢਿੱਲੋਂ
ਜਗਰਾਉਂ, 11 ਦਸੰਬਰ

ਸਿੱਧਵਾਂ ਬੇਟ ਇਲਾਕੇ ਦੇ ਪਿੰਡ ਅੱਬੂਪੁਰਾ ਦੇ ਮੌਜੂਦਾ ਸਰਪੰਚ ਗੁਰਮੀਤ ਸਿੰਘ ਵੱਲੋਂ ਵੇਚੀ ਝੋਨੇ ਦੀ ਫਸਲ ਦੇ ਪੈਸੇ ਗੁਆਂਢੀ ਜ਼ਿਲ੍ਹੇ ਮੋਗਾ ’ਚ ਕਿਸੇ ਖਾਤੇ ’ਚ ਪੈਣ ਕਾਰਨ ਪਨਸਪ ਤੇ ਆੜ੍ਹਤੀ ਭੰਬਲਭੂਸੇ ਵਿੱਚ ਪੈ ਗਏ, ਜਿਸ ਮਗਰੋਂ ਖਾਤਾਧਾਰਕ ਦੀ ਪਛਾਣ ਕਰਕੇ ਕੇਸ ਦਰਜ ਕੀਤਾ ਗਿਆ ਹੈ। ਪੀੜਤ ਸਰਪੰਚ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਵੇਚੇ ਝੋਨੇ ਦੀ ਰਕਮ ਜੋ ਕਿ 3.39300 ਲੱਖ ਰੁਪਏ ਬਣਦੀ ਸੀ, ਜੋ ਉਸ ਦੇ ਖਾਤੇ ਵਿੱਚ ਨਾ ਆਈ। ਆੜ੍ਹਤੀ ਨੇ ਜਦੋਂ ਪਨਸਪ ਵਿਭਾਗ ਨਾਲ ਸੰਪਰਕ ਕੀਤਾ ਤਾਂ ਪਤਾ ਲੱਗਾ ਕਿ 3.39300 ਲੱਖ ਰੁਪਏ ਇਡਬੀ ਬੈਂਕ ਬ੍ਰਾਂਚ ਮੋਗਾ (ਨੇੜ੍ਹੇ ਦਾਣਾ ਮੰਡੀ) ਵਿੱਚ ਬਲਤੇਜ ਸਿੰਘ ਵਾਸੀ ਕੋਠੇ ਪੱਤੀ ਮੁਹੱਬਤ ਬੁੱਧ ਸਿੰਘ ਵਾਲਾ ਜ਼ਿਲ੍ਹਾ ਮੋਗਾ ਦੇ ਖਾਤੇ ਵਿੱਚ 28 ਅਕਤੂਬਰ ਨੂੰ ਟਰਾਂਸਫਰ ਹੋ ਚੁੱਕੇ ਹਨ।