ਚੰਦਪੁਰਾ ’ਚ ਨਜਾਇਜ਼ ਕਲੋਨੀ ’ਤੇ ਚੱਲਿਆ ਪੀਲਾ ਪੰਜਾ

ਅੰਬਾਲਾ (ਸਰਬਜੀਤ ਸਿੰਘ ਭੱਟੀ): ਜ਼ਿਲ੍ਹਾ ਨਗਰ ਯੋਜਨਾਕਾਰ, ਅੰਬਾਲਾ ਵੱਲੋਂ ਚੰਦਪੁਰਾ ਪਿੰਡ ਵਿਚ ਲਗਪਗ ਅੱਠ ਏਕੜ ਜ਼ਮੀਨ ’ਤੇ ਨਾਜਾਇਜ਼ ਢੰਗ ਨਾਲ ਬਣਾਈ ਜਾ ਰਹੀ ਇਕ ਕਲੋਨੀ ’ਚ ਕਾਰਵਾਈ ਕਰਦਿਆਂ ਪੀਲਾ ਪੰਜਾ ਚਲਾਇਆ ਅਤੇ ਨਾਜਾਇਜ਼ ਕੱਚੀਆਂ ਸੜਕਾਂ, ਨੀਹਾਂ ਨੂੰ ਪੂਰੀ ਤਰ੍ਹਾਂ ਢਾਹ ਦਿੱਤਾ ਗਿਆ। ਇਸ ਮੁਹਿੰਮ ਦੀ ਅਗਵਾਈ ਡਿਊਟੀ ਮੈਜਿਸਟਰੇਟ ਰੋਹਿਤ ਚੌਹਾਨ ਨੇ ਕੀਤੀ, ਜਿਨ੍ਹਾਂ ਦੇ ਨਾਲ ਸਿਵਲ ਇੰਜੀਨੀਅਰ ਰਵਿੰਦਰ, ਸੇਵਾਦਾਰ ਕਸ਼ਮੀਰੀ ਅਤੇ ਇਨਫੋਰਸਮੈਂਟ ਐੱਸਐੱਚਓ ਭਾਰੀ ਪੁਲੀਸ ਬਲ ਸਮੇਤ ਮੌਕੇ ’ਤੇ ਮੌਜੂਦ ਰਹੇ। ਸ੍ਰੀ ਚੌਹਾਨ ਨੇ ਲੋਕਾਂ ਨੂੰ ਸੂਚਿਤ ਕਰਦਿਆਂ ਕਿਹਾ ਕਿ ਕੁਝ ਪ੍ਰਾਪਰਟੀ ਡੀਲਰ ਲੋਕਾਂ ਨੂੰ ਕਲੋਨੀਆਂ ਦੇ ਰੈਗੂਲਰ ਹੋਣ ਦੇ ਝਾਂਸੇ ਦੇ ਕੇ ਪਲਾਟ ਵੇਚ ਰਹੇ ਹਨ। ਉਨ੍ਹਾਂ ਲੋਕਾਂ ਨੂੰ ਚਿਤਾਵਨੀ ਦਿੰਦਿਆਂ ਕਿਹਾ ਕਿ ਅਜਿਹੀਆਂ ਨਾਜਾਇਜ਼ ਕਲੋਨੀਆਂ ਵਿੱਚ ਨਾ ਤਾਂ ਕੋਈ ਪਲਾਟ ਖਰੀਦੇ ਜਾਣ, ਨਾ ਹੀ ਕੋਈ ਇਮਾਰਤ ਬਣਾਈ ਜਾਵੇ, ਨਹੀਂ ਤਾਂ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।