ਗੁਰਦੁਆਰਾ ਚੋਣਾਂ: ਪੰਚਕੂਲਾ ’ਚ 13 ਪੋਲਿੰਗ ਸਟੇਸ਼ਨ ਬਣਾਏ

ਪੱਤਰ ਪ੍ਰੇਰਕ
ਪੰਚਕੂਲਾ, 5 ਜਨਵਰੀ
ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਲਈ ਵਾਰਡ-1 ਕਾਲਕਾ ਅਤੇ ਵਾਰਡ-2 ਪੰਚਕੂਲਾ ਦੇ ਪੋਲਿੰਗ ਸਟੇਸ਼ਨਾਂ ਦੀਆਂ ਸੂਚੀਆਂ ਜਾਰੀ ਕਰ ਦਿੱਤੀਆਂ ਗਈਆਂ ਹਨ। ਦੋਵਾਂ ਥਾਵਾਂ ’ਤੇ 13 ਪੋਲਿੰਗ ਸਟੇਸ਼ਨ ਬਣਾਏ ਗਏ ਹਨ। ਵਾਰਡ ਨੰਬਰ-1 ਕਾਲਕਾ ਵਿੱਚ ਸੱਤ ​​ਅਤੇ ਵਾਰਡ ਨੰਬਰ 2 ਪੰਚਕੂਲਾ ਵਿੱਚ ਛੇ ਪੋਲਿੰਗ ਸਟੇਸ਼ਨ ਬਣਾਏ ਗਏ ਹਨ। ਇਹ ਜਾਣਕਾਰੀ ਡਿਪਟੀ ਕਮਿਸ਼ਨਰ ਪੰਚਕੂਲਾ ਮੋਨਿਕਾ ਗੁਪਤਾ ਨੇ ਦਿੱਤੀ। ਉਨ੍ਹਾਂ ਕਿਹਾ ਕਿ ਕੋਈ ਵੀ ਚਾਹਵਾਨ ਵਿਅਕਤੀ ਜਾਂ ਵੋਟਰ ਇਨ੍ਹਾਂ ਸੂਚੀਆਂ ਨੂੰ ਦੇਖ ਸਕਦਾ ਹੈ। ਇਹ ਸੂਚੀਆਂ ਜ਼ਿਲ੍ਹਾ ਪ੍ਰਸ਼ਾਸਨ ਪੰਚਕੂਲਾ ਦੀ ਅਧਿਕਾਰਤ ਵੈੱਬਸਾਈਟ, ਉਪ ਮੰਡਲ ਅਫ਼ਸਰ (ਸਿਵਲ), ਪੰਚਕੂਲਾ ਅਤੇ ਕਾਲਕਾ ਦੇ ਦਫ਼ਤਰਾਂ ਦੇ ਨੋਟਿਸ ਬੋਰਡਾਂ ’ਤੇ ਲਗਾਈਆਂ ਗਈਆਂ ਹਨ।