ਕੈਨੇਡਾ ’ਚ ਪੀਆਰ ਦਿਵਾਉਣ ਦਾ ਝਾਂਸਾ ਦੇ ਕੇ 40 ਲੱਖ ਠੱਗੇ

ਨਿੱਜੀ ਪੱਤਰ ਪ੍ਰੇਰਕ
ਸੰਗਰੂਰ, 7 ਮਈ
ਕੈਨੇਡਾ ਵਿੱਚ ਇੱਕ ਨੌਜਵਾਨ ਨੂੰ ਪੀ.ਆਰ. ਕਰਾਉਣ ਦਾ ਵਾਅਦਾ ਕਰਕੇ ਅਤੇ ਫਰਜ਼ੀ ਵਿਆਹ ਕਰਵਾ ਕੇ 40 ਲੱਖ ਰੁਪਏ ਦੀ ਠੱਗੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਨੌਜਵਾਨ ਦੇ ਪਿਤਾ ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਸਬੰਧਤ ਲੜਕੀ ਅਤੇ ਉਸ ਦੇ ਮਾਤਾ-ਪਿਤਾ ਖ਼ਿਲਾਫ਼ ਸੰਗਰੂਰ ਪੁਲੀਸ ਵਲੋਂ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਗਿਆ ਹੈ। ਥਾਣਾ ਸਿਟੀ ਪੁਲੀਸ ਵਲੋਂ ਦਰਜ ਕੇਸ ਅਨੁਸਾਰ ਦਰਸ਼ਨ ਸਿੰਘ ਵਾਸੀ ਅਫ਼ਸਰ ਕਲੋਨੀ ਸੰਗਰੂਰ ਨੇ ਪੁਲੀਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ ਕਿ ਉਸ ਦੇ ਲੜਕੇ ਗੁਰਪ੍ਰੀਤ ਸਿੰਘ ਨੂੰ ਕੈਨੇਡਾ ਵਿੱਚ ਪੀ.ਆਰ. ਕਰਾਉਣ ਦਾ ਵਾਅਦਾ ਕਰਕੇ ਤਨਵੀਰ ਕੌਰ ਨੇ ਉਸ ਨਾਲ ਫਰਜ਼ੀ ਵਿਆਹ ਕਰਵਾ ਕੇ ਕਰੀਬ 40 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ। ਦਰਸ਼ਨ ਸਿੰਘ ਦੀ ਸ਼ਿਕਾਇਤ ’ਤੇ ਥਾਣਾ ਸਿਟੀ ਪੁਲੀਸ ਨੇ ਤਨਵੀਰ ਕੌਰ, ਉਸ ਦੇ ਪਿਤਾ ਸੁਖਦੇਵ ਸਿੰਘ ਅਤੇ ਮਾਤਾ ਅੰਗਰੇਜ਼ ਕੌਰ ਵਾਸੀਆਨ ਸੰਗਰੂਰ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।

ਚੋਰੀ ਦੇ ਦੋਸ਼ ਹੇਠ ਕੇਸ ਦਰਜ
ਸ਼ਹਿਰ ਨੇੜੇ ਮੰਗਵਾਲ ਕਲੋਨੀ ਵਿੱਚ ਇੱਕ ਘਰ ਵਿਚ ਚੋਰੀ ਹੋਈ ਹੈ। ਜਗਮੇਲ ਸਿੰਘ ਵਾਸੀ ਮੰਗਵਾਲ ਕਲੋਨੀ ਸੰਗਰੂਰ ਨੇ ਪੁਲੀਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਕਿ ਉਹ ਘਰ ਤੋਂ ਬਾਹਰ ਸੀ ਤਾਂ ਉਸਦੇ ਘਰ ਵਿਚੋਂ 30 ਹਜ਼ਾਰ ਰੁਪਏ, ਗੈਸ ਸੈਲੰਡਰ ਅਤੇ ਕੁੱਝ ਗਹਿਣੇ ਚੋਰੀ ਹੋਈ ਸੀ ਤਾਂ ਮੁਦਈ ਵਲੋਂ ਖੁਦ ਪੜਤਾਲ ਕਰਕੇ ਦੋਸ਼ੀਆਨ ਬਾਰੇ ਪਤਾ ਲਗਾਇਆ। ਇਸ ਸ਼ਿਕਾਇਤ ’ਤੇ ਥਾਣਾ ਸਦਰ ਪੁਲੀਸ ਸੰਗਰੂਰ ਨੇ ਸ਼ੈਰੀ ਅਤੇ ਰਾਣਾ ਸਿੰਘ ਵਾਸੀ ਮੰਗਵਾਲ ਕਲੋਨੀ ਸੰਗਰੂਰ ਦੇ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।