ਮੁੱਖ ਖ਼ਬਰਾਂਦੇਸ਼ਵਿਦੇਸ਼ਖੇਡਾਂਕਾਰੋਬਾਰਚੰਡੀਗੜ੍ਹਦਿੱਲੀਪਟਿਆਲਾਸਾਹਿਤਫ਼ੀਚਰਸਤਰੰਗਖੇਤੀਬਾੜੀਹਰਿਆਣਾਪੰਜਾਬਮਾਲਵਾਮਾਝਾਦੋਆਬਾਅੰਮ੍ਰਿਤਸਰਜਲੰਧਰਲੁਧਿਆਣਾਸੰਗਰੂਰਬਠਿੰਡਾਪ੍ਰਵਾਸੀ
ਕਲਾਸੀਫਾਈਡ | ਵਰ ਦੀ ਲੋੜਕੰਨਿਆ ਦੀ ਲੋੜਹੋਰ ਕਲਾਸੀਫਾਈਡ
ਮਿਡਲਸੰਪਾਦਕੀਪਾਠਕਾਂ ਦੇ ਖ਼ਤਮੁੱਖ ਲੇਖ
Advertisement

ਕਾਵਿ ਕਿਆਰੀ

04:06 AM Jun 08, 2025 IST
featuredImage featuredImage

ਮਾਂ

ਦਰਸ਼ਨ ਚੀਮਾ

Advertisement

ਚਿੰਤਾ ਤਾਂ ਉਸ ਨੂੰ ਉਦੋਂ ਦੀ ਹੀ
ਵੱਢ ਵੱਢ ਖਾਈ ਜਾਂਦੀ ਸੀ
ਜਦੋਂ ਦਾ ਬਾਹਰੋਂ
ਕਿਸੇ ਤੋਂ ਸੁਣ ਕੇ ਆਈ ਹੈ
ਕਿ ਗੁਆਂਢੀ ਮੁਲਕ ਨਾਲ
ਜੰਗ ਛਿੜ ਗਈ ਹੈ

ਉਪਰੋਂ ਬਲੈਕਆਊਟ ਦੀ ਸੂਚਨਾ
ਟੀ ਵੀ ’ਤੇ ਆ ਰਹੀਆਂ ਖ਼ਬਰਾਂ ਨੇ ਤਾਂ
ਉਸ ਦਾ ਸਾਹ ਹੀ ਸੂਤ ਲਿਆ ਸੀ
ਮਾਂ ਸੀ ਆਖ਼ਰ

Advertisement

ਹਾਲੇ ਹਫ਼ਤਾ ਪਹਿਲਾਂ ਹੀ ਗਿਆ ਹੈ
ਛੁੱਟੀ ਕੱਟ ਕੇ ਉਸ ਦਾ ਸ਼ਿੰਦਾ ਪੁੱਤ
ਫੋਨ ਵੀ ਨਹੀਂ ਸੀ ਲੱਗ ਰਿਹਾ...

ਸਾਰੀ ਰਾਤ ਬੁਰੇ ਜਿਹੇ ਖ਼ਿਆਲ
ਆਉਂਦੇ ਰਹੇ
ਪਹਿਲਾਂ ਕਾਰਗਿਲ ਵਿੱਚ
ਸਿਰ ਦਾ ਸਾਂਈ
ਤੇ ਹੁਣ...

ਸੁੱਖ ਰੱਖੀਂ ਮਾਲਕਾ
ਅੰਮ੍ਰਿਤ ਵੇਲਾ ਹੋਇਆ
ਉਸ ਨੇ ਇਸ਼ਨਾਨ ਕੀਤਾ
ਗੁਰੂਘਰ ਵੱਲ ਚੱਲ ਪਈ
ਰਸਤੇ ਵਿੱਚ ਵੀ
ਵਾਹਿਗੁਰੂ ਵਾਹਿਗੁਰੂ
ਜਪੀ ਜਾ ਰਹੀ ਸੀ...

ਉਸ ਨੇ ਮੱਥਾ ਟੇਕਿਆ
ਹੇ ਸੱਚੇ ਪਾਤਸ਼ਾਹ
ਸਰਹੱਦ ’ਤੇ ਮੇਰਾ ਸ਼ਿੰਦਾ
ਦੇਸ਼ ਲਈ ਲੜ ਰਿਹਾ
ਉਹਦੇ ਸਿਰ ’ਤੇ
ਆਪਣਾ ਹੱਥ ਰੱਖਣਾ
ਤੱਤੀ ’ਵਾ ਨਾ ਲੱਗਣ ਦੇਈਂ...

ਦਾਤਿਆ
ਓਸ ਪੁੱਤ ਦੇ ਵੀ ਅੰਗ ਸੰਗ ਰਹੀਂ
ਜਿਹੜਾ ਮੇਰੇ ਪੁੱਤ ਦੇ ਸਾਹਮਣੇ
ਬੰਦੂਕ ਤਾਣੀ ਖੜ੍ਹਾ
ਆਪਣੇ ਮੁਲਕ ਲਈ
ਲੜ ਰਿਹਾ ਹੈ
ਆਖ਼ਰ ਉਹ ਵੀ ਤਾਂ
ਕਿਸੇ ਮਾਂ ਦਾ ਪੁੱਤ ਹੀ ਹੈ...।
ਸੰਪਰਕ: 98154-94433

ਰੁੱਤੇ ਬੇਈਮਾਨ ਨਾ ਹੋਈਂ

ਰਵਨੀਤ ਕੌਰ ਢੀਂਡਸਾ ਔਲਖ

ਅਸੀਂ ਕੱਢਣੇ ਦੰਦਾਂ ’ਚੋਂ ਹਾਸੇ,
ਕਿ ਰੁੱਤੇ ਬੇਈਮਾਨ ਨਾ ਹੋਈਂ।
ਸਾਡੇ ਸੁੱਕ ਗਏ ਨੇ ਬੁੱਲ੍ਹ ਪਿਆਸੇ,
ਕਿ ਰੁੱਤੇ ਬੇਈਮਾਨ ਨਾ ਹੋਈਂ।

ਰੁੱਤ ਏ ਬਹਾਰਾਂ ਦੀ, ਜਾਪੇ ਪੱਤਝੜ ਜਿਉਂ ਆਈ ਏ,
ਖਿੜਿਆ ਏ ਫੁੱਲ, ਲੱਗੇ ਕਲੀ ਮੁਰਝਾਈ ਏ।
ਆਈ ਮੌਜ ਨਾ, ਲੰਘੀ ਏ ਪਾਸੇ ਪਾਸੇ,
ਕਿ ਰੁੱਤੇ ਬੇਈਮਾਨ ਨਾ ਹੋਈਂ।

ਚੜ੍ਹਿਆ ਏ ਦਿਨ, ਸੀਨੇ ਚਾਅ ਕਿਤੇ ਪਾਉਣ ਦੇ,
ਬੈਠੇ ਆਂ ਬਰੂਹੇ, ਧੂਹ ਖੇੜੇ ਲੈ ਕੇ ਆਉਣ ਦੇ।
ਪਾ ਬੈਠੀਂ ਨਾ, ਕਿਤੇ ਹੋਰ ਈ ਸਿਆਪੇ,
ਕਿ ਰੁੱਤੇ ਬੇਈਮਾਨ ਨਾ ਹੋਈਂ।

ਅਰਸ਼ੀ ਤਾਰਿਆਂ ਦਾ, ਨਜ਼ਾਰਾ ਕਿਤੇ ਦੇਖਾਂਗੇ,
ਮਾਂ ਦੇ ਨਿੱਘ ਜਿਹੀ, ਬਹਿ ਧੁੱਪ ਘੜੀ ਸੇਕਾਂਗੇ।
ਪਰ ਕਰੀਂ ਨਾ ਕਿਤੇੇ ਹੋਰ ਇਹ ਖੁਲਾਸੇ,
ਕਿ ਰੁੱਤੇ ਬੇਈਮਾਨ ਨਾ ਹੋਈਂ।

ਹੋ ਜਾਵੀਂ ਮਿਹਰਬਾਨ, ਕਿਤੇ ਨਾਚੀਜ਼ ’ਤੇ
ਬਾਲ ਗ਼ਮਾਂ ਦੀ ਧੂਣੀ, ਦਿਲ ਦੀ ਦਹਿਲੀਜ਼ ’ਤੇ।
ਥੋੜ੍ਹੇ ਦੇ ਕੇ ਜਾਈਂ ਅੱਜ ਧਰਵਾਸੇ
ਕਿ ਰੁੱਤੇ ਬੇਈਮਾਨ ਨਾ ਹੋਈਂ।
ਅਸੀਂ ਕੱਢਣੇ ਦੰਦਾਂ ’ਚੋਂ ਹਾਸੇ।

Advertisement