ਕਾਰ ਦਾ ਸੰਤੁਲਨ ਵਿਗੜਨ ਕਾਰਨ ਦੋ ਔਰਤਾਂ ਜ਼ਖ਼ਮੀ

ਪਠਾਨਕੋਟ (ਪੱਤਰ ਪ੍ਰੇਰਕ): ਪਿੰਡ ਦੁਨੇਰਾ ਸੜਕ ’ਤੇ ਕਾਰ ਅੱਗੇ ਆਵਾਰਾ ਪਸ਼ੂ ਆ ਜਾਣ ਕਾਰਨ ਸੰਤੁਲਨ ਵਿਗੜ ਗਿਆ ਅਤੇ ਕਾਰ ਸੜਕ ਕਿਨਾਰੇ ਪਹਾੜੀ ਨਾਲ ਜਾ ਟਕਰਾਈ। ਇਸ ਹਾਦਸੇ ’ਚ ਕਾਰ ਸਵਾਰ ਦੋ ਔਰਤਾਂ ਜ਼ਖ਼ਮੀ ਹੋ ਗਈਆਂ। ਉਨ੍ਹਾਂ ਦਾ ਸਿਵਲ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਹੈ। ਜ਼ਖਮੀ ਔਰਤ ਛਾਬਲੀ ਵਾਸੀ ਚੰਬਾ (ਹਿਮਾਚਲ ਪ੍ਰਦੇਸ਼) ਨੇ ਦੱਸਿਆ ਕਿ ਉਸ ਦੀ ਬੇਟੀ ਪੂਨਮ ਮੁਕੇਰੀਆਂ ਵਿੱਚ ਵਿਆਹੀ ਹੋਈ ਹੈ। ਉਹ ਤੇ ਉਸ ਦਾ ਬੇਟਾ ਪਵਨ ਕੁਮਾਰ ਮੁਕੇਰੀਆਂ ਤੋਂ ਬੇਟੀ ਨੂੰ ਲੈ ਕੇ ਵਾਪਸ ਚੰਬਾ ਜਾ ਰਹੇ ਸਨ। ਜਦ ਕਾਰ ਦੁਨੇਰਾ ਕੋਲ ਪੁੱਜੀ ਤਾਂ ਸੜਕ ’ਤੇ ਅਚਾਨਕ ਆਵਾਰਾ ਪਸ਼ੂ ਆ ਗਿਆ। ਪਸ਼ੂ ਨੂੰ ਬਚਾਉਣ ਦੇ ਚੱਕਰ ਵਿੱਚ ਕਾਰ ਦਾ ਸੰਤੁਲਨ ਵਿਗੜ ਗਿਆ ਅਤੇ ਕਾਰ ਸੜਕ ਕਿਨਾਰੇ ਪਹਾੜੀ ਨਾਲ ਜਾ ਟਕਰਾਈ। ਇਸ ਨਾਲ ਉਸ ਦੇ ਸਿਰ ’ਤੇ ਗੰਭੀਰ ਸੱਟਾਂ ਵੱਜੀਆਂ ਜਦ ਕਿ ਬੇਟੀ ਪੂਨਮ ਦੇ ਪੈਰ ’ਤੇ ਸੱਟ ਵੱਜੀ।