ਸੇਂਟ ਕਬੀਰ ਸਕੂਲ ’ਚ ਵਿਸਾਖੀ ਮਨਾਈ

ਧਾਰੀਵਾਲ: ਸੇਂਟ ਕਬੀਰ ਪਬਲਿਕ ਸਕੂਲ ਸੁਲਤਾਨਪੁਰ ਵਿੱਚ ਵਿਸਾਖੀ ਮਨਾਈ ਗਈ। ਸਕੂਲ ਦੇ ਪ੍ਰਿੰਸੀਪਲ ਐਸ.ਬੀ.ਨਾਯਰ ਦੀ ਸਰਪ੍ਰਸਤੀ ਅਤੇ ਪ੍ਰਬੰਧਕ ਨਵਦੀਪ ਕੌਰ ਤੇ ਕੁਲਦੀਪ ਕੌਰ ਦੀ ਅਗਵਾਈ ਹੇਠ ਰੰਗਾਰੰਗ ਪ੍ਰੋਗਰਾਮ ਕਰਵਾਇਆ ਗਿਆ। ਪ੍ਰੋਗਰਾਮ ਦੀ ਸ਼ੁਰੂਆਤ ਵਿਦਿਆਰਥੀਆਂ ਨੇ ਸ਼ਬਦ ਕੀਰਤਨ ਨਾਲ ਕੀਤੀ। ਉਪਰੰਤ ਵਿਦਿਆਰਥਣ ਜਸਨਪ੍ਰੀਤ ਕੌਰ ਨੇ ਵਿਸਾਖੀ ਦੇ ਮੇਲੇ ਦੀ ਮਹੱਤਤਾ ਬਾਰੇ ਵਿਚਾਰ ਸਾਂਝੇ ਕੀਤੇ। ਖੁਸ਼ਪ੍ਰੀਤ ਕੌਰ ਤੇ ਐਸਮੀਤ ਕੌਰ ਨੇ ਸਟੇਜੀ ਕਾਰਵਾਈ ਨੂੰ ਅੱਗੇ ਤੋਰਦਿਆਂ ਤੀਸਰੀ ਤੋਂ ਸੱਤਵੀਂ ਜਮਾਤ ਦੇ ਮੁੰਡੇ- ਕੁੜੀਆਂ ਦਾ ਪੰਜਾਬੀ ਲੋਕ ਗੀਤ (ਫੋਕ ਸੌਂਗ) ਦਾ ਇੰਟਰ-ਹਾਊਸ ਮੁਕਾਬਲਾ ਕਰਵਾਇਆ। ਸਕੂਲ ਦੇ ਚਾਰ ਹਾਊਸ ਸਫਾਇਰ, ਐਮਰਲਡ, ਐਂਬਰ ਤੇ ਰੂਬੀ ਨੇ ਪੰਜਾਬੀ ਵਿਰਸਾ ਸਟਾਲ ਲਗਾ ਕੇ ਪੁਰਾਤਨ ਖਾਣ-ਪੀਣ, ਖੇਤੀਬਾੜੀ ਸੰਦ, ਰੀਤੀ-ਰਿਵਾਜ ਤੇ ਸੱਭਿਆਚਾਰਕ ਪਹਿਰਾਵੇ ਦੀ ਝਲਕ ਅਤੇ ਵੱਖ ਵੱਖ ਖੇਡਾਂ ਨੂੰ ਸਾਰਿਆਂ ਦੇ ਰੂਬਰੂ ਕਰਕੇ ਵਿਲੱਖਣ ਪੁਰਾਤਨ ਪੇਂਡੂ ਮਲਕੀਅਤ ਦੀਆਂ ਪੁਰਾਣੀਆਂ ਯਾਦਾਂ ਨੂੰ ਤਾਜ਼ਾ ਕਰ ਦਿੱਤਾ। -ਪੱਤਰ ਪ੍ਰੇਰਕ