ਯੂਕੇ ਦੀ 156 ਸਾਲ ਪੁਰਾਣੀ ‘ਰੌਇਲ ਟਰੇਨ’ ਸੇਵਾ ਹੋਵੇਗੀ ਸਮਾਪਤ

ਲੰਡਨ, 1 ਜੁਲਾਈ
ਬਰਤਾਨੀਆ ਦੀ ‘ਰੌਇਲ ਟਰੇਨ’ ਹੁਣ ਜਲਦੀ ਹੀ ਆਖਰੀ ਵਾਰ ਸਟੇਸ਼ਨ ਤੋਂ ਰਵਾਨਾ ਹੋਵੇਗੀ। ਬਕਿੰਘਮ ਪੈਲੇੇਸ ਨੇ ਸੋਮਵਾਰ ਨੂੰ ਕਿਹਾ ਕਿ ਕਿੰਗ ਚਾਰਲਸ (ਤੀਜੇ) ਨੇ ਸਵੀਕਾਰ ਕੀਤਾ ਹੈ ਕਿ ਮਹਾਰਾਣੀ ਵਿਕਟੋਰੀਆ ਦੇ ਸਮੇਂ ਤੋਂ ਚੱਲ ਰਹੀ ਇਹ ਰੇਲਗੱਡੀ ਬੰਦ ਕਰਨ ਦਾ ਸਮਾਂ ਆ ਗਿਆ ਹੈ, ਕਿਉਂਕਿ ਇਸ ਦੇ ਸੰਚਾਲਨ ਦੀ ਲਾਗਤ ਬਹੁਤ ਜ਼ਿਆਦਾ ਹੈ ਤੇ ਅਤੇ ਵੱਧ ਆਧੁਨਿਕ ਰੇਲ ਪ੍ਰਣਾਲੀਆਂ ਲਈ ਇਸ ਵਿੱਚ ਅਹਿਮ ਬਦਲਾਅ ਦੀ ਲੋੜ ਹੋਵੇਗੀ। ਸ਼ਾਹੀ ਮਹਿਲ ਦੇ ਵਿੱਤੀ ਮਾਮਲਿਆਂ ਦੇ ਇੰਚਾਰਜ ਜੇਮਸ ਚਾਰਲਸ ਨੇ ਕਿਹਾ, ‘‘ਭਵਿੱਖ ਵੱਲ ਵਧਦਿਆਂ ਸਾਨੂੰ ਅਤੀਤ ’ਚ ਬੱਝੇ ਨਹੀਂ ਰਹਿਣਾ ਚਾਹੀਦਾ।’’ ਉਨ੍ਹਾਂ ਕਿਹਾ, ‘‘ਜਿਵੇਂ ਸ਼ਾਹੀ ਪਰਿਵਾਰ ਦੇ ਹੋਰ ਕੰਮ ਆਧੁਨਿਕ ਹੋਏ ਹਨ, ਉਸ ਤਰ੍ਹਾਂ ਹੁਣ ਸਮਾਂ ਆ ਗਿਆ ਹੈ ਅਸੀਂ ਇਸ ਰਵਾਇਤ ਨੂੰ ਸਨਮਾਨ ਨਾਲ ਵਿਦਾਇਗੀ ਦੇਈਏ।’’ ਇਸ ਫ਼ੈਸਲੇ ਦਾ ਐਲਾਨ ਸ਼ਾਹੀ ਖਰਚਿਆਂ ’ਤੇ ਪੈਲੇਸ ਦੀ ਸਾਲਾਨਾ ਪ੍ਰੈੱਸ ਕਾਨਫਰੰਸ ਦੌਰਾਨ ਕੀਤਾ ਗਿਆ। ਟਰੇਨ ਦੇ ਨੌਂ ਡੱਬੇ ਹਨ। 2027 ਵਿੱਚ ਇਸ ਦੀ ਸਾਂਭ-ਸੰਭਾਲ ਸਬੰਧੀ ਕਰਾਰ ਖਤਮ ਹੋਣ ਤੋਂ ਪਹਿਲਾਂ ਇਸ ਦੀਆਂ ਸੇਵਾਵਾਂ ਬੰਦ ਕਰ ਦਿੱਤੀਆਂ ਜਾਣਗੀਆਂ। ਇਹ ਰੇਲਗੱਡੀ ਮਹਾਰਾਣੀ ਵਿਕਟੋਰੀਆ ਨੇ 1869 ਵਿੱਚ ਆਪਣੀ ਯਾਤਰਾਵਾਂ ਲਈ ਚਲਾਈ ਸੀ। -ਏਪੀ