ਮੋਟਰਸਾਈਕਲ ਐਂਬੂਲੈਂਸ ਸੇਵਾ ਪੂਰੀ ਦਿੱਲੀ ’ਚ ਸ਼ੁਰੂ ਹੋਵੇਗੀ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 20 ਸਤੰਬਰ
ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਬਾਈਕ ਐਂਬੂਲੈਂਸ ਸੇਵਾ ਵਧਾਉਣ ਜਾ ਰਹੇ ਹਨ ਤਾਂ ਜੋ ਦਿੱਲੀ ਦੀਆਂ ਭੀੜੀਆਂ ਗਲੀਆਂ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਬਿਹਤਰ ਸਿਹਤ ਸਹੂਲਤਾਂ ਦਾ ਲਾਭ ਮਿਲ ਸਕੇ। ਮੁੱਖ ਮੰਤਰੀ ਨੇ ਟਵੀਟ ਕਰਕੇ ਇਸ ਬਾਰੇ ਜਾਣਕਾਰੀ ਦਿੱਤੀ।
ਫਰਵਰੀ ਵਿਚ ਬਾਈਕ ਐਂਬੂਲੈਂਸ ਨੂੰ 16 ਬਾਈਕ ਨਾਲ ਪੂਰਬੀ ਦਿੱਲੀ ਦੇ ਪਾਇਲਟ ਸ਼ੁਰੂ ਕੀਤਾ ਗਿਆ ਸੀ, ਜਿਸ ਦੇ ਬਹੁਤ ਸਕਾਰਾਤਮਕ ਨਤੀਜੇ ਸਾਹਮਣੇ ਆਏ ਹਨ। ਸੇਵਾ ਭੀੜ ਵਾਲੇ ਖੇਤਰ ਦੇ ਹਸਪਤਾਲ ਲਿਜਾਣ ਤੋਂ ਪਹਿਲਾਂ ਪੀੜਤ ਨੂੰ ਤੁਰੰਤ ਇਲਾਜ ਪ੍ਰਦਾਨ ਕਰ ਰਹੀ ਹੈ। ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕਿਹਾ, ‘ਮੈਨੂੰ ਖੁਸ਼ੀ ਹੈ ਕਿ ਤੰਗ ਗਲੀਆਂ ਵਿਚ ਰਹਿੰਦੇ ਮਰੀਜ਼ ਸਾਈਕਲ ਐਂਬੂਲੈਂਸਾਂ ਰਾਹੀਂ ਸਿਹਤ ਸਹੂਲਤਾਂ ਵੀ ਪ੍ਰਾਪਤ ਕਰ ਰਹੇ ਹਨ।’
ਉਨ੍ਹਾਂ ਕਿਹਾ ਕਿ ਸੱਠ ਪ੍ਰਤੀਸ਼ਤ ਲੋਕ ਦਿੱਲੀ ਦੀਆਂ ਅਣਅਧਿਕਾਰਤ ਕਲੋਨੀਆਂ ਵਿੱਚ ਰਹਿੰਦੇ ਹਨ। ਜ਼ਿਆਦਾਤਰ ਤੰਗ ਗਲੀਆਂ ਇਨ੍ਹਾਂ ਕਲੋਨੀਆਂ ਵਿਚ ਹਨ। ਇਸ ਨੂੰ ਧਿਆਨ ਵਿਚ ਰੱਖਦੇ ਹੋਏ, ਇਕ ਬਾਈਕ ਐਂਬੂਲੈਂਸ ਸੇਵਾ ਲਿਆਂਦੀ ਗਈ, ਜਿਸ ਦੇ ਨਤੀਜੇ ਵਧੀਆ ਆਏ। ਇਸ ਲਈ ਪੂਰੀ ਦਿੱਲੀ ਵਿੱਚ ਇਸ ਨੂੰ ਲਾਗੂ ਕਰਨ ਦੀ ਯੋਜਨਾ ਬਣਾਈ ਜਾ ਰਹੀ ਹੈ। ਬਾਈਕ ਐਂਬੂਲੈਂਸ ਸੇਵਾ ਕਾਰਨ ਤਿੰਨ ਮਹੀਨਿਆਂ ਵਿੱਚ ਪੂਰਬੀ ਦਿੱਲੀ ਵਿੱਚ ਸੱਤ ਸੌ ਜਾਨਾਂ ਬਚਾਈਆਂ ਗਈਆਂ। ਇਸ ਸੇਵਾ ਦੇ ਕਾਰਨ ਲੋਕਾਂ ਨੂੰ ਤੁਰੰਤ ਡਾਕਟਰੀ ਸਹਾਇਤਾ ਮਿਲੀ।

ਐਂਬੂਲੈਂਸ ਵਿਚ ਹਨ ਇਹ ਸਹੂਲਤਾਂ
ਬਾਈਕ ਐਂਬੂਲੈਂਸ ’ਚ ਪੋਰਟੇਬਲ ਆਕਸੀਜਨ ਸਿਲੰਡਰ, ਫਸਟ ਏਡ ਕਿੱਟ ਅਤੇ ਡਰੈਸਿੰਗ ਸਮਗਰੀ, ਏਅਰ ਸਪਲਿੰਟ, ਫੋਲਡੇਬਲ ਟ੍ਰਾਂਸਫਰ ਸ਼ੀਟ, ਗਲੂਕੋਮੀਟਰ, ਪਲਸ ਆਕਸੀਮੀਟਰ, ਪੋਰਟੇਬਲ ਮੈਨੂਅਲ ਮਸ਼ੀਨ, ਜੀਪੀਐੱਸ ਜੰਤਰ, ਸੰਚਾਰ ਉਪਕਰਨ, ਦਿਲ ਦੇ ਦੌਰੇ ਦੀ ਜਾਂਚ ਕਰਨ ਵਾਲੀ ਮਸ਼ੀਨ ਆਦਿ ਸਹੂਲਤਾਂ ਉੁਪਲਬਧ ਹੋਣਗੀਆਂ।