ਬਨੂੜ ਦੀਆਂ ਗਲੀਆਂ ’ਚ ਖੜਨ ਲੱਗਾ ਸੀਵਰੇਜ ਦਾ ਪਾਣੀ

ਕਰਮਜੀਤ ਸਿੰਘ ਚਿੱਲਾ
ਬਨੂੜ, 9 ਮਈ

ਬਨੂੜ ਸ਼ਹਿਰ ਵਿੱਚ ਲੱਗੇ ਸੀਵਰੇਜ ਦੇ ਟਰੀਟਮੈਂਟ ਪਲਾਂਟ ਦੀਆਂ ਮੋਟਰਾਂ ਪੂਰਾ ਸਮਾਂ ਨਾ ਚੱਲਣ ਕਾਰਨ ਸ਼ਹਿਰ ਦੀਆਂ ਗਲੀਆਂ ਵਿਚ ਸੀਵਰੇਜ ਦਾ ਪਾਣੀ ਓਵਰਫ਼ਲੋਅ ਹੋਣ ਲੱਗਿਆ ਹੈ। ਬਨੂੜ ਦੇ ਬੰਦਾ ਸਿੰਘ ਬਹਾਦਰ ਗੁਰਦੁਆਰਾ ਸਾਹਿਬ ਦੇ ਪਿਛਲੇ ਪਾਸੇ ਅਤੇ ਕਈਂ ਹੋਰ ਵਾਰਡਾਂ ਦੀਆਂ ਗਲੀਆਂ ਵਿਚ ਗੰਦਾ ਪਾਣੀ ਓਵਰਫ਼ਲੋਅ ਹੋ ਰਿਹਾ ਹੈ ਤੇ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਸ਼ਹਿਰ ਦੇ ਵਸਨੀਕਾਂ ਨੇ ਨਗਰ ਕੌਂਸਲ ਦੇ ਪ੍ਰਧਾਨ ਤੇ ਕਾਰਜਸਾਧਕ ਅਫਸਰ ਤੋਂ ਓਵਰਫ਼ਲੋਅ ਹੋ ਰਹੇ ਸੀਵਰੇਜ ਦੇ ਪਾਣੀ ਨੂੰ ਤੁਰੰਤ ਰੋਕੇ ਜਾਣ ਦੀ ਮੰਗ ਕਰਦਿਆਂ ਖਦਸ਼ਾ ਪ੍ਰਗਟਾਇਆ ਕਿ ਇਸ ਨਾਲ ਬਰਸਾਤ ਦੇ ਦਿਨਾਂ ਵਿਚ ਬਿਮਾਰੀਆਂ ਫੈਲਣਾ ਦਾ ਵੀ ਡਰ ਹੈ। ਸ਼ਹਿਰ ਵਾਸੀਆਂ ਨੇ ਦੱਸਿਆ ਕਿ ਸੀਵਰੇਜ ਟਰੀਟਮੈਂਟ ਪਲਾਂਟ ਵਿਚ ਵੱਡੀ ਸਮਰੱਥਾ ਵਾਲਾ ਜੈਰਨੇਟਰ ਮੌਜੂਦ ਹੈ ਪਰ ਇਸ ਨੂੰ ਚਲਾਇਆ ਨਹੀਂ ਜਾਂਦਾ।
ਇਸ ਮਾਮਲੇ ਬਾਰੇ ਸੀਵਰੇਜ ਦਾ ਕੰਮ ਕਰਨ ਵਾਲੇ ਠੇਕੇਦਾਰ ਪਵਿੱਤਰ ਸਿੰਘ ਨੇ ਦੱਸਿਆ ਕਿ ਪਿਛਲੇ ਕੁਝ ਦਿਨਾਂ ਤੋਂ ਟਰੀਟਮੈਂਟ ਪਲਾਂਟ ਵਿੱਚ ਬਿਜਲੀ ਦੀ ਸਪਲਾਈ ਘੱਟ ਆ ਰਹੀ ਹੈ, ਜਿਸ ਕਾਰਨ ਟਰੀਟਮੈਂਟ ਪਲਾਂਟ ਵਿੱਚ ਲੱਗੀਆਂ ਮੋਟਰਾਂ ਪੂਰਾ ਸਮਾਂ ਨਹੀਂ ਚੱਲਦੀਆਂ। ਮੋਟਰਾਂ ਨਾ ਚੱਲਣ ਕਾਰਨ ਪੂਰਾ ਪਾਣੀ ਨਹੀਂ ਖਿੱਚਿਆ ਜਾਂਦਾ ਤੇ ਓਵਰਫ਼ਲੋਅ ਹੋ ਜਾਂਦਾ ਹੈ। ਟਰੀਟਮੈਂਟ ਪਲਾਂਟ ’ਚ ਜੈਨਰੇਟਰ ਨਾ ਚਲਾਉਣ ਬਾਰੇ ਉਨ੍ਹਾਂ ਕਿਹਾ ਕਿ ਜੈਨਰੇਟਰ ਵਿੱਚ ਤੇਲ ਪਵਾਉਣ ਤੇ ਬਿਜਲੀ ਦੀ ਘੱਟ ਆ ਰਹੀ ਸਪਲਾਈ ਸਬੰਧੀ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੂੰ ਸੂਚਿਤ ਕਰ ਦਿੱਤਾ ਹੈ।

ਮਾਮਲਾ ਧਿਆਨ ’ਚ ਨਹੀਂ: ਐੱਸਡੀਓ

ਵਿਭਾਗ ਤੇ ਐੱਸਡੀਓ ਲਵਕੇਸ਼ ਕੁਮਾਰ ਨੇ ਦੱਸਿਆ ਕਿ ਟਰੀਟਮੈਂਟ ਪਲਾਟ ’ਚ ਬਿਜਲੀ ਦੀ ਸਪਲਾਈ ਘੱਟ ਆਉਣ ਕਾਰਨ ਮੋਟਰਾਂ ਨਾ ਚੱਲਣ ਅਤੇ ਜੈਰਨੇਟਰ ਵਿੱਚ ਤੇਲ ਨਾ ਹੋਣ ਦਾ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿੱਚ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਮਾਮਲੇ ਨੂੰ ਹੱਲ ਕਰਨ ਲਈ ਉਹ ਜੇਈ ਦੀ ਡਿਊਟੀ ਲਾ ਰਹੇ ਹਨ।