ਪੈਸੇ ਨਾ ਦੇਣ ’ਤੇ ਫਲਾਂ ਵਾਲੇ ਦਾ ਕੰਨ ਵੱਢਿਆ

ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 12 ਅਪਰੈਲ
ਥਾਣਾ ਡਿਵੀਜ਼ਨ ਨੰਬਰ 3 ਦੇ ਇਲਾਕੇ ਵਿੱਚ ਸਥਿਤ ਵੈਸ਼ਨੋ ਦੇਵੀ ਮੰਦਰ ਦੇ ਪਿਛਲੇ ਪਾਸੇ ਉਸ ਵੇਲੇ ਤਣਾਅਪੂਰਨ ਸਥਿਤੀ ਬਣ ਗਈ ਜਦੋਂ ਇੱਕ ਸ਼ਰਾਬੀ ਵਿਅਕਤੀ ਨੇ ਫਲ ਦੀ ਰੇਹੜੀ ਲਗਾਉਣ ਵਾਲੇ ਵਿਅਕਤੀ ਦਾ ਕੰਨ ਵੱਢ ਦਿੱਤਾ ਕਿਉਂਕਿ ਉਸ ਨੇ ਸ਼ਰਾਬੀ ਨੂੰ ਪੈਸੇ ਦੇਣ ਤੋਂ ਇਨਕਾਰ ਕਰ ਦਿੱਤਾ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਗੌਰਵ ਕੁਮਾਰ ਵਾਸੀ ਮੁਹੱਲਾ ਤਾਜਗੰਜ ਨੇ ਸ਼ਰਾਬੀ ਹਾਲਤ ਵਿੱਚ ਫਲ ਦੀ ਰੇਹੜੀ ਲਗਾਉਣ ਵਾਲੇ ਰੌਕੀ ਕੋਲੋਂ ਪੈਸੇ ਮੰਗੇ। ਰੋਕੀ ਦੇ ਮਨ੍ਹਾਂ ਕਰਨ ’ਤੇ ਉਸ ਨੇ ਹੱਥੋਪਾਈ ਕਰਦਿਆਂ ਉਸ ਦੇ ਸੱਜੇ ਕੰਨ ਦੇ ਹੇਠਾਂ ਦੰਦੀ ਵੱਢੀ ਅਤੇ ਕੰਨ ਦਾ ਥੱਲ੍ਹੇ ਵਾਲਾ ਹਿੱਸਾ ਕੱਟ ਦਿੱਤਾ। ਰੌਕੀ ਦੇ ਰੌਲਾ ਪਾਉਣ ’ਤੇ ਉਹ ਧਮਕੀਆਂ ਦਿੰਦਾ ਹੋਇਆ ਫਰਾਰ ਹੋ ਗਿਆ। ਪੁਲੀਸ ਨੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।