ਛੋਟਾ ਪਰਦਾ

ਧਰਮਪਾਲ
ਵੰਦਨਾ ਪਾਠਕ ਪੰਜ ਸਾਲ ਬਾਅਦ ਟੀਵੀ ’ਤੇ ਪਰਤੀ
ਜ਼ੀ ਟੀਵੀ ਨੇ ਹਮੇਸ਼ਾਂ ਦਿਲ ਨੂੰ ਛੂਹ ਲੈਣ ਵਾਲੀਆਂ ਕਹਾਣੀਆਂ ਪ੍ਰਦਰਸ਼ਿਤ ਕੀਤੀਆਂ ਹਨ। ਹੁਣ ਚੈਨਲ ਇੱਕ ਨਵੀਂ ਕਹਾਣੀ ਲੈ ਕੇ ਆ ਰਿਹਾ ਹੈ ‘ਤੁਮ ਸੇ ਤੁਮ ਤੱਕ’। ਇਹ ਅਨੋਖੀ ਪ੍ਰੇਮ ਕਹਾਣੀ ਦੋ ਬਹੁਤ ਹੀ ਵੱਖ-ਵੱਖ ਜ਼ਿੰਦਗੀਆਂ - ਇੱਕ ਸਧਾਰਨ ਪਰਿਵਾਰ ਦੀ 19 ਸਾਲਾ ਜੋਸ਼ੀਲੀ ਕੁੜੀ ਅਨੂ ਅਤੇ 46 ਸਾਲਾ ਮਿਹਨਤੀ ਅਤੇ ਅਨੁਸ਼ਾਸਿਤ ਕਾਰੋਬਾਰੀ ਆਰੀਆਵਰਧਨ ਵਿਚਕਾਰ ਦਿਲ ਨੂੰ ਛੂਹ ਲੈਣ ਵਾਲਾ ਰਿਸ਼ਤਾ ਹੈ। ਉਨ੍ਹਾਂ ਦਾ ਰਿਸ਼ਤਾ ਸਮਾਜਿਕ ਨਿਯਮਾਂ ਨੂੰ ਚੁਣੌਤੀ ਦਿੰਦਾ ਹੈ ਅਤੇ ਪਿਆਰ, ਉਮਰ ਅਤੇ ਸਵੀਕਾਰ ਕਰਨ ਬਾਰੇ ਸਵਾਲ ਉਠਾਉਂਦਾ ਹੈ।
ਨਿਹਾਰਿਕਾ ਚੌਕਸੀ ਅਤੇ ਸ਼ਰਦ ਕੇਲਕਰ ਅਨੁ ਅਤੇ ਆਰਿਆਵਰਧਨ ਦੀ ਭੂਮਿਕਾ ਵਿੱਚ ਨਜ਼ਰ ਆਉਣਗੇ। ਇਸ ਕਹਾਣੀ ਨੂੰ ਹੋਰ ਦਿਲਚਸਪ ਬਣਾਉਣ ਲਈ ਮਸ਼ਹੂਰ ਟੈਲੀਵਿਜ਼ਨ ਅਦਾਕਾਰਾ ਵੰਦਨਾ ਪਾਠਕ ਆ ਰਹੀ ਹੈ ਜੋ ਲਗਭਗ ਪੰਜ ਸਾਲਾਂ ਬਾਅਦ ਟੀਵੀ ’ਤੇ ਵਾਪਸੀ ਕਰ ਰਹੀ ਹੈ। ਉਹ ਇਸ ਸ਼ੋਅ ਵਿੱਚ ਗਾਇਤਰੀ ਦੇਵੀ ਦਾ ਕਿਰਦਾਰ ਨਿਭਾਏਗੀ। ਗਾਇਤਰੀ ਦੇਵੀ ਇੱਕ ਅਜਿਹੀ ਔਰਤ ਹੈ ਜੋ ਸ਼ਿਸ਼ਟਾਚਾਰੀ ਅਤੇ ਸਖ਼ਤ ਦੋਵੇਂ ਹੈ! ਆਪਣੀ ਆਲੀਸ਼ਾਨ ਜ਼ਿੰਦਗੀ ਦੇ ਬਾਵਜੂਦ, ਉਹ ਆਪਣੀਆਂ ਸੱਚੀਆਂ ਕਦਰਾਂ ਕੀਮਤਾਂ ਨਾਲ ਜੁੜੀ ਹੋਈ ਹੈ। ਉਹ ਆਪਣੀ ਦਿਆਲਤਾ ਅਤੇ ਇਮਾਨਦਾਰੀ ਲਈ ਹਰ ਕਿਸੇ ਦੀ ਪਸੰਦੀਦਾ ਬਣ ਗਈ ਹੈ। ਉਸ ਦਾ ਸਭ ਤੋਂ ਵੱਡਾ ਸੁਪਨਾ ਆਰਿਆਵਰਧਨ ਦੀ ਜ਼ਿੰਦਗੀ ਵਿੱਚ ਖੁਸ਼ਹਾਲ ਵਿਆਹ ਹੈ। ਉਸ ਦੀ ਮੌਜੂਦਗੀ ਇਸ ਕਹਾਣੀ ਵਿੱਚ ਭਾਵਨਾਵਾਂ ਅਤੇ ਨੇੜਤਾ ਲਿਆਏਗੀ।
ਵੰਦਨਾ ਪਾਠਕ ਨੇ ਕਿਹਾ, “ਜ਼ੀ ਟੀਵੀ ਮੇਰੇ ਲਈ ਘਰ ਵਾਂਗ ਹੈ। ਮੈਂ ਇਸ ਚੈਨਲ ’ਤੇ ਲਗਭਗ 30 ਸਾਲ ਪਹਿਲਾਂ ਸ਼ੋਅ ‘ਹਮ ਪਾਂਚ’ ਨਾਲ ਆਪਣਾ ਟੈਲੀਵਿਜ਼ਨ ਡੈਬਿਊ ਕੀਤਾ ਸੀ। ਇਸ ਸ਼ੋਅ ਨੇ ਮੈਨੂੰ ਪਛਾਣ ਅਤੇ ਯਾਦਾਂ ਦਿੱਤੀਆਂ ਜੋ ਮੇਰੇ ਕੋਲ ਅਜੇ ਵੀ ਹਨ। ਇੰਨੇ ਸਾਲਾਂ ਬਾਅਦ ਉਸੇ ਚੈਨਲ ’ਤੇ ਵਾਪਸ ਆਉਣਾ ਮੇਰੇ ਲਈ ਬਹੁਤ ਭਾਵੁਕ ਪਲ ਹੈ। ਦਰਅਸਲ, ਪੰਜ ਸਾਲ ਦਾ ਬਰੇਕ ਲੈਣ ਤੋਂ ਪਹਿਲਾਂ ਮੇਰਾ ਆਖਰੀ ਸ਼ੋਅ ਜ਼ੀ ਟੀਵੀ ’ਤੇ ਸੀ। ਮੈਂ ਆਪਣੀ ਵਾਪਸੀ ਲਈ ਇੱਕ ਚੰਗੇ ਪ੍ਰਾਜੈਕਟ ਦੀ ਉਡੀਕ ਕਰ ਰਹੀ ਸੀ ਅਤੇ ‘ਤੁਮ ਸੇ ਤੁਮ ਤੱਕ’ ਉਹ ਕਹਾਣੀ ਹੈ। ਕਹਾਣੀ ਸੁੰਦਰ ਹੈ, ਇਸ ਦੇ ਬਹੁਤ ਸਾਰੇ ਪਹਿਲੂ ਹਨ। ਜਿਵੇਂ ਹੀ ਮੈਂ ਗਾਇਤਰੀ ਦੇਵੀ ਬਾਰੇ ਪੜ੍ਹਿਆ, ਮੈਨੂੰ ਲੱਗਾ ਕਿ ਇਹ ਭੂਮਿਕਾ ਮੇਰੇ ਲਈ ਹੀ ਹੈ। ਉਸ ਵਿੱਚ ਤਾਕਤ ਹੈ, ਦਿਆਲਤਾ ਹੈ... ਉਹ ਇੱਕ ਸ਼ਾਂਤ ਵਿਅਕਤੀ ਹੈ। ਮੇਰੇ ਲਈ ਇਹ ਸਨਮਾਨ ਦੀ ਗੱਲ ਹੈ ਕਿ ਮੈਂ ਅਜਿਹੇ ਵਿਅਕਤੀ ਨੂੰ ਪਰਦੇ ’ਤੇ ਪੇਸ਼ ਕਰਾਂ। ਮੈਂ ਸੈੱਟ ’ਤੇ ਵਾਪਸ ਆਉਣ, ਆਪਣੇ ਦਰਸ਼ਕਾਂ ਨਾਲ ਜੁੜਨ ਅਤੇ ਇੱਕ ਵਾਰ ਫਿਰ ਕੁਝ ਖ਼ਾਸ ਕਰਨ ਲਈ ਬਹੁਤ ਉਤਸ਼ਾਹਿਤ ਹਾਂ। ਮੈਨੂੰ ਉਮੀਦ ਹੈ ਕਿ ਦਰਸ਼ਕ ਮੈਨੂੰ ਉਸੇ ਪਿਆਰ ਨਾਲ ਸਵੀਕਾਰ ਕਰਨਗੇ ਜਿਵੇਂ ਉਨ੍ਹਾਂ ਨੇ ਹਮੇਸ਼ਾਂ ਕੀਤਾ ਹੈ।
ਪੁਰੂ ਨੇ ‘ਉਡਨੇ ਕੀ ਆਸ਼ਾ’ ਦੀ ਯਾਤਰਾ ਸਾਂਝੀ ਕੀਤੀ

ਸਟਾਰ ਪਲੱਸ ਦੇ ਸ਼ੋਅ ‘ਉਡਨੇ ਕੀ ਆਸ਼ਾ’ ਵਿੱਚ ਤੇਜਸ ਦੇ ਵਿਲੱਖਣ ਕਿਰਦਾਰ ਨੂੰ ਜੀਵਨ ਵਿੱਚ ਲਿਆਉਣ ਵਾਲੇ ਅਦਾਕਾਰ ਪੁਰੂ ਦਾ ਕਹਿਣਾ ਹੈ ਕਿ ਇਹ ਭੂਮਿਕਾ ਉਸ ਲਈ ਬਹੁਤ ਖ਼ਾਸ ਹੈ। ਪੁਰੂ ਨੇ ਦੱਸਿਆ ਕਿ ਦਰਸ਼ਕ ਤੇਜਸ ਦੇ ਇਸ ਵਿਲੱਖਣ ਕਿਰਦਾਰ ਨਾਲ ਕਿਵੇਂ ਡੂੰਘਾਈ ਨਾਲ ਜੁੜ ਰਹੇ ਹਨ। ‘‘ਮੈਨੂੰ ਲੱਗਦਾ ਹੈ ਕਿ ਤੇਜਸ ਦਾ ਮੌਜੂਦਾ ਟਰੈਕ ਸੱਚਮੁੱਚ ਮਜ਼ਾਕੀਆ ਹੈ।’’
ਪੁਰੂ ਨੇ ਇਸ ਕਿਰਦਾਰ ਬਾਰੇ ਟੀਮ ਨੂੰ ਕੁਝ ਨਵੇਂ ਵਿਚਾਰ ਵੀ ਦਿੱਤੇ ਹਨ। ‘‘ਮੈਂ ਪ੍ਰੋਡਕਸ਼ਨ ਟੀਮ ਨੂੰ ਕਹਿ ਰਿਹਾ ਸੀ ਕਿ ਸਾਨੂੰ ਸਿਰਫ਼ ਤੇਜਸ ’ਤੇ ਇੱਕ ਮਿੰਨੀ-ਸੀਰੀਜ਼ ਬਣਾਉਣੀ ਚਾਹੀਦੀ ਹੈ। ਮੈਨੂੰ ਨਹੀਂ ਲੱਗਦਾ ਕਿ ਅਜਿਹਾ ਕਿਰਦਾਰ ਪਹਿਲਾਂ ਟੀਵੀ ’ਤੇ ਆਇਆ ਹੈ। ਰੱਬ ਦਾ ਸ਼ੁਕਰ ਹੈ ਕਿ ਮੈਨੂੰ ਇਹ ਨਿਭਾਉਣ ਦਾ ਮੌਕਾ ਮਿਲਿਆ। ਮੈਨੂੰ ਉਮੀਦ ਹੈ ਕਿ ਮੈਂ ਇਸ ਕਿਰਦਾਰ ਨਾਲ ਇਨਸਾਫ਼ ਕਰ ਸਕਾਂਗਾ।’’
ਪੁਰੂ ਲਈ, ਸਭ ਤੋਂ ਵੱਡੀ ਸੰਤੁਸ਼ਟੀ ਉਦੋਂ ਹੁੰਦੀ ਹੈ ਜਦੋਂ ਦਰਸ਼ਕ ਉਸ ਦੇ ਕਿਰਦਾਰ ਨੂੰ ਪਰਦੇ ਤੋਂ ਬਾਹਰ ਗਲੇ ਲਗਾਉਣਾ ਸ਼ੁਰੂ ਕਰਦੇ ਹਨ। ਉਹ ਕਹਿੰਦਾ ਹੈ, ‘‘ਜਦੋਂ ਲੋਕ ਤੁਹਾਡੇ ਕਿਰਦਾਰ ਦੀ ਨਕਲ ਕਰਨਾ ਸ਼ੁਰੂ ਕਰਦੇ ਹਨ, ਤਾਂ ਇਹ ਸਭ ਤੋਂ ਵੱਡੀ ਪ੍ਰਸ਼ੰਸਾ ਹੁੰਦੀ ਹੈ। ਇਸ ਦਾ ਮਤਲਬ ਹੈ ਕਿ ਤੁਸੀਂ ਸੱਚਮੁੱਚ ਲੋਕਾਂ ਨਾਲ ਜੁੜੇ ਹੋ।’’
ਹਾਲਾਂਕਿ, ਉਸ ਦੇ ਸਭ ਤੋਂ ਵੱਡੇ ਚੀਅਰਲੀਡਰ ਘਰ ਵਿੱਚ ਹਨ। ਉਹ ਦੱਸਦਾ ਹੈ, ‘‘ਮੇਰਾ ਪਰਿਵਾਰ, ਖ਼ਾਸ ਕਰਕੇ ਮੇਰੀ ਮਾਂ ਜੋ ਕਿ ਇੱਕ ਅਦਾਕਾਰਾ ਵੀ ਹੈ, ਹਮੇਸ਼ਾਂ ਮੇਰਾ ਸਮਰਥਨ ਕਰਦੀ ਹੈ।’’
ਸੋਸ਼ਲ ਮੀਡੀਆ ਦੇ ਯੁੱਗ ਵਿੱਚ ਜਦੋਂ ਸਟਾਰਡਮ ਅਤੇ ਫੀਡਬੈਕ ਪਲਕ ਝਪਕਦੇ ਹੀ ਬਦਲ ਸਕਦੇ ਹਨ, ਪੁਰੂ ਆਪਣੇ ਆਪ ਨੂੰ ਸਥਿਰ ਰੱਖਦਾ ਹੈ। ਉਹ ਕਹਿੰਦਾ ਹੈ, ‘‘ਪ੍ਰਸ਼ੰਸਾ ਮਹੱਤਵਪੂਰਨ ਹੈ, ਪਰ ਸੋਸ਼ਲ ਮੀਡੀਆ ਨੂੰ ਆਪਣੇ ਆਪ ’ਤੇ ਹਾਵੀ ਨਾ ਹੋਣ ਦਿਓ। ਇੱਥੇ ਹਰ ਤਰ੍ਹਾਂ ਦੇ ਵਿਚਾਰ ਹਨ - ਕੁਝ ਚੰਗੇ, ਕੁਝ ਮਾੜੇ। ਤੁਹਾਨੂੰ ਸਿਰਫ਼ ਸ਼ੋਰ ਨੂੰ ਨਜ਼ਰਅੰਦਾਜ਼ ਕਰਨਾ ਸਿੱਖਣਾ ਪਵੇਗਾ। ਜਿੰਨਾ ਚਿਰ ਤੁਹਾਡੀ ਟੀਮ ਅਤੇ ਤੁਹਾਡੇ ਆਪਣੇ ਲੋਕ ਤੁਹਾਡੇ ਕੰਮ ਤੋਂ ਖ਼ੁਸ਼ ਹਨ, ਇਹੀ ਸਭ ਤੋਂ ਵੱਧ ਮਾਅਨੇ ਰੱਖਦਾ ਹੈ।’’
ਟੀਵੀ ਦੀ ਸ਼ਕਤੀ ਬਾਰੇ ਪੁਰੂ ਕਹਿੰਦਾ ਹੈ, ‘‘ਟੀਵੀ ਸ਼ੋਅ ਦਰਸ਼ਕਾਂ ਦੀ ਰੋਜ਼ਾਨਾ ਜ਼ਿੰਦਗੀ ਦਾ ਹਿੱਸਾ ਬਣ ਜਾਂਦੇ ਹਨ। ਜੇਕਰ ਕਹਾਣੀ ਮਜ਼ਬੂਤ ਹੈ ਅਤੇ ਰੁਝੇਵੇਂ ਬਣੇ ਰਹਿੰਦੇ ਹਨ ਤਾਂ ਸ਼ੋਅ ਸਾਲਾਂ ਤੱਕ ਚੱਲ ਸਕਦਾ ਹੈ।’’
ਆਪਣੇ ਸਹਿ-ਕਲਾਕਾਰਾਂ ਬਾਰੇ ਗੱਲ ਕਰਦਿਆਂ ਉਹ ਮੰਨਦਾ ਹੈ ਕਿ ਕੈਮਰੇ ਦੇ ਪਿੱਛੇ ਦੀ ਦੋਸਤੀ ਕੈਮਰੇ ਦੇ ਸਾਹਮਣੇ ਪ੍ਰਦਰਸ਼ਨ ਨੂੰ ਬਿਹਤਰ ਬਣਾਉਂਦੀ ਹੈ। ‘‘ਜਦੋਂ ਤੁਹਾਡੇ ਸਹਿ-ਕਲਾਕਾਰ ਸਹਿਯੋਗੀ ਅਤੇ ਸਮਝਦਾਰ ਹੁੰਦੇ ਹਨ, ਤਾਂ ਕੰਮ ਆਸਾਨ ਹੋ ਜਾਂਦਾ ਹੈ। ਇੱਥੇ ਕੋਈ ਹੰਕਾਰ ਨਹੀਂ ਹੁੰਦਾ, ਸਿਰਫ਼ ਆਪਸੀ ਸਮਝ ਅਤੇ ਸਹਿਯੋਗ ਹੁੰਦਾ ਹੈ। ਇਹ ਸਾਨੂੰ ਇੱਕ ਟੀਮ ਦੇ ਰੂਪ ਵਿੱਚ ਅੱਗੇ ਵਧਣ ਵਿੱਚ ਮਦਦ ਕਰਦਾ ਹੈ।’’
ਟੀਵੀ ਕਲਾਕਾਰਾਂ ਪ੍ਰਤੀ ਲੋਕ ਧਾਰਨਾ ਬਦਲਣ: ਸ਼ੁਭਾਂਗੀ ਅਤਰੇ

ਐਂਡ ਟੀਵੀ ਸ਼ੋਅ ‘ਭਾਬੀਜੀ ਘਰ ਪਰ ਹੈਂ’ ਤੋਂ ਪਛਾਣ ਹਾਸਲ ਕਰਨ ਵਾਲੀ ਅਦਾਕਾਰਾ ਸ਼ੁਭਾਂਗੀ ਅਤਰੇ ਦਾ ਮੰਨਣਾ ਹੈ ਕਿ ਮਨੋਰੰਜਨ ਉਦਯੋਗ ਤੇਜ਼ੀ ਨਾਲ ਅੱਗੇ ਵਧ ਰਿਹਾ ਹੈ ਅਤੇ ਆਉਣ ਵਾਲੇ ਸਮੇਂ ਵਿੱਚ ਇਹ ਹੋਰ ਵੀ ਬਦਲਣ ਵਾਲਾ ਹੈ। ਉਸ ਦਾ ਮੰਨਣਾ ਹੈ ਕਿ ਇਹ ਬਦਲਾਅ ਕਈ ਵਾਰ ਬਹੁਤ ਜ਼ਿਆਦਾ ਲੱਗ ਸਕਦੇ ਹਨ।
ਸ਼ੁਭਾਂਗੀ ਕਹਿੰਦੀ ਹੈ ਕਿ ਇੰਡਸਟਰੀ ਪਹਿਲਾਂ ਹੀ ਬਹੁਤ ਬਦਲ ਗਈ ਹੈ, ਖ਼ਾਸ ਕਰਕੇ ਕੋਵਿਡ ਤੋਂ ਬਾਅਦ। ਕੰਮ ਸੱਭਿਆਚਾਰ ਅਤੇ ਬਜਟ ਦੋਵੇਂ ਬਦਲ ਗਏ ਹਨ। ਅਗਲੇ ਪੰਜ ਸਾਲਾਂ ਵਿੱਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦੇ ਵਧਦੇ ਪ੍ਰਭਾਵ ਨਾਲ ਮੈਨੂੰ ਲੱਗਦਾ ਹੈ ਕਿ ਚੀਜ਼ਾਂ ਹੋਰ ਵੀ ਬਦਲ ਜਾਣਗੀਆਂ। ਇਮਾਨਦਾਰੀ ਨਾਲ ਕਹਾਂ ਤਾਂ ਇਹ ਥੋੜ੍ਹਾ ਡਰਾਉਣਾ ਹੈ, ਪਰ ਮੈਂ ਅਜੇ ਵੀ ਮੰਨਦੀ ਹਾਂ ਕਿ ‘ਕੰਟੈਂਟ ਹੀ ਕਿੰਗ ਹੈ।’ ਜੇਕਰ ਤੁਸੀਂ ਚੰਗਾ ਕੰਟੈਂਟ ਬਣਾਉਂਦੇ ਹੋ ਤਾਂ ਇਹ ਜ਼ਰੂਰ ਕੰਮ ਕਰੇਗਾ। ਲੋਕ ਅੱਜਕੱਲ੍ਹ ਬਹੁਤ ਤਣਾਅ ਵਿੱਚ ਹਨ, ਮਨੋਰੰਜਨ ਉਨ੍ਹਾਂ ਨੂੰ ਕੁਝ ਰਾਹਤ ਦਿੰਦਾ ਹੈ। ਸੰਗੀਤ ਅਤੇ ਮਨੋਰੰਜਨ ਲੋਕਾਂ ਨੂੰ ਆਰਾਮ ਦਿੰਦੇ ਹਨ, ਇਸ ਲਈ ਸਾਨੂੰ ਚੰਗੇ ਕੰਟੈਂਟ ’ਤੇ ਧਿਆਨ ਕੇਂਦਰਿਤ ਕਰਨਾ ਚਾਹੀਦਾ ਹੈ।’’
ਜਦੋਂ ਉਸ ਤੋਂ ਪੁੱਛਿਆ ਗਿਆ ਕਿ ਉਹ ਇੰਡਸਟਰੀ ਵਿੱਚ ਕਿਹੜੇ ਬਦਲਾਅ ਦੇਖਣਾ ਚਾਹੁੰਦੀ ਹੈ, ਤਾਂ ਉਸ ਨੇ ਕਿਹਾ, ‘‘ਟੀਵੀ ਕੰਟੈਂਟ ਅਜੇ ਵੀ ਥੋੜ੍ਹਾ ਪ੍ਰਤੀਕਿਰਿਆਸ਼ੀਲ ਹੈ, ਇਹ ਮੈਨੂੰ ਪਰੇਸ਼ਾਨ ਕਰਦਾ ਹੈ। ਸਾਨੂੰ ਯਕੀਨੀ ਤੌਰ ’ਤੇ ਹੋਰ ਪ੍ਰਗਤੀਸ਼ੀਲ ਸ਼ੋਅ ਬਣਾਉਣੇ ਚਾਹੀਦੇ ਹਨ। ਦੂਜਾ, ਮੈਨੂੰ ਲੱਗਦਾ ਹੈ ਕਿ ਟੀਵੀ ਕਲਾਕਾਰਾਂ ਨੂੰ ਉਹ ਸਨਮਾਨ ਨਹੀਂ ਮਿਲਦਾ ਜਿਸ ਦੇ ਉਹ ਹੱਕਦਾਰ ਹਨ। ਲੋਕ ਅਕਸਰ ਟੀਵੀ ਕਲਾਕਾਰਾਂ ਨੂੰ ਗੰਭੀਰਤਾ ਨਾਲ ਨਹੀਂ ਲੈਂਦੇ। ਇੱਕ ਧਾਰਨਾ ਹੈ ਕਿ ਟੀਵੀ ਕਲਾਕਾਰ ਜ਼ਿਆਦਾ ਪ੍ਰਤਿਭਾਸ਼ਾਲੀ ਨਹੀਂ ਹੁੰਦੇ, ਪਰ ਸੱਚਾਈ ਇਹ ਹੈ ਕਿ ਭਾਵੇਂ ਕੋਈ ਵੀ ਪਲੈਟਫਾਰਮ ਹੋਵੇ, ਇੱਕ ਕਲਾਕਾਰ ਦੀ ਮਿਹਨਤ ਅਤੇ ਸਮਰਪਣ ਦੀ ਕਦਰ ਕੀਤੀ ਜਾਣੀ ਚਾਹੀਦੀ ਹੈ। ਡੇਲ੍ਹੀ ਸੋਪ ਵਿੱਚ ਕੰਮ ਕਰਨਾ ਕੋਈ ਮਜ਼ਾਕ ਨਹੀਂ ਹੈ, ਇਹ ਇੱਕ ਪੂਰੇ ਸਮੇਂ ਦੀ ਵਚਨਬੱਧਤਾ ਹੈ। ਟੀਵੀ ਕਲਾਕਾਰਾਂ ਪ੍ਰਤੀ ਲੋਕਾਂ ਦੀ ਧਾਰਨਾ ਬਦਲਣੀ ਚਾਹੀਦੀ ਹੈ।’’
ਇਸ ਦੇ ਨਾਲ ਹੀ, ਉਹ ਮੰਨਦੀ ਹੈ ਕਿ ਉਦਯੋਗ ਦਾ ਪ੍ਰਤੀਯੋਗੀ ਸੁਭਾਅ ਕਦੇ ਨਹੀਂ ਬਦਲੇਗਾ। ‘‘ਮੁਕਾਬਲਾ ਅਸਲੀ ਹੈ। ਕਈ ਵਾਰ ਕੁਝ ਲੋਕ ਕੁਝ ਭੂਮਿਕਾਵਾਂ ਨਹੀਂ ਕਰਨਾ ਚਾਹੁੰਦੇ ਜਾਂ ਪ੍ਰਾਜੈਕਟ ਛੱਡਣਾ ਨਹੀਂ ਚਾਹੁੰਦੇ। ਇਹ ਉਨ੍ਹਾਂ ਦੀ ਨਿੱਜੀ ਪਸੰਦ ਹੈ ਅਤੇ ਮੈਂ ਇਸ ਦਾ ਸਤਿਕਾਰ ਕਰਦੀ ਹਾਂ, ਪਰ ਜੇਕਰ ਕੋਈ ਵਧੇਰੇ ਵਚਨਬੱਧ, ਵਧੇਰੇ ਅਨੁਸ਼ਾਸਿਤ ਜਾਂ ਕੰਮ ਕਰਨ ਲਈ ਜ਼ਿਆਦਾ ਤਿਆਰ ਹੈ, ਤਾਂ ਉਨ੍ਹਾਂ ਨੂੰ ਜ਼ਰੂਰ ਮੌਕੇ ਮਿਲਣਗੇ। ਮੈਂ ਬਸ ਇਹ ਮੰਨਦੀ ਹਾਂ ਕਿ ਕਿਸੇ ਤੋਂ ਕੰਮ ਨਾ ਖੋਹੋ, ਪਰ ਜੇਕਰ ਕੋਈ ਇਹ ਨਹੀਂ ਕਰਨਾ ਚਾਹੁੰਦਾ ਅਤੇ ਤੁਸੀਂ ਇਹ ਕਰ ਸਕਦੇ ਹੋ, ਤਾਂ ਇਹ ਕਰਨ ਵਿੱਚ ਕੋਈ ਨੁਕਸਾਨ ਨਹੀਂ ਹੈ। ਜ਼ਿੰਦਗੀ ਚੱਲਦੀ ਰਹਿੰਦੀ ਹੈ। ਕੁਝ ਵੀ ਅਟੱਲ ਨਹੀਂ ਹੈ। ਸਟਾਰਡਮ ਬਹੁਤ ਅਸਥਾਈ ਹੈ। ਅਸੀਂ ਸਾਰੇ ਸਕਰੀਨ ’ਤੇ ਥੋੜ੍ਹੇ ਸਮੇਂ ਲਈ ਚਿਹਰੇ ਹਾਂ। ਅਸਲ ਵਿੱਚ ਮਾਅਨੇ ਰੱਖਣ ਵਾਲੀ ਗੱਲ ਇਹ ਹੈ ਕਿ ਅਸੀਂ ਕਿੰਨਾ ਵਧੀਆ ਪ੍ਰਦਰਸ਼ਨ ਕਰਦੇ ਹਾਂ ਅਤੇ ਲੋਕ ਸਾਡੇ ਨਾਲ ਕਿੰਨੇ ਜੁੜੇ ਹਨ।’’