ਛੋਟਾ ਪਰਦਾ

ਧਰਮਪਾਲ
ਰੋਨਿਤ ਰਾਏ ਦਾ ਸੰਵੇਦਨਸ਼ੀਲ ਰੂਪ
ਸੋਨੀ ਐਂਟਰਟੇਨਮੈਂਟ ਟੈਲੀਵਿਜ਼ਨ ਆਪਣਾ ਬਹੁਤ-ਉਡੀਕਿਆ ਜਾਣ ਵਾਲਾ ਇਤਿਹਾਸਕ ਸ਼ੋਅ ‘ਚੱਕਰਵਰਤੀ ਸਮਰਾਟ ਪ੍ਰਿਥਵੀਰਾਜ ਚੌਹਾਨ’ ਪੇਸ਼ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹੈ। ਇਹ ਇੱਕ ਦਿਲਚਸਪ ਯਾਤਰਾ ਹੈ ਜੋ ਇੱਕ ਨੌਜਵਾਨ ਰਾਜਕੁਮਾਰ ਦੇ ਉਭਾਰ ਨੂੰ ਦਰਸਾਉਂਦੀ ਹੈ ਜੋ ਭਾਰਤ ਦੇ ਸਭ ਤੋਂ ਛੋਟੇ ਅਤੇ ਬਹਾਦਰ ਯੋਧਾ ਸਮਰਾਟਾਂ ਵਿੱਚੋਂ ਇੱਕ ਬਣਿਆ ਅਤੇ ਸਭ ਤੋਂ ਭਿਆਨਕ ਹਮਲਾਵਰਾਂ ਦਾ ਸਾਹਮਣਾ ਕੀਤਾ। ਸ਼ਾਹੀ ਵਿਰਾਸਤ ਅਤੇ ਸਦੀਵੀ ਕਦਰਾਂ-ਕੀਮਤਾਂ ਦੇ ਪਿਛੋਕੜ ਵਿੱਚ ਇਹ ਸ਼ੋਅ ਪ੍ਰਿਥਵੀਰਾਜ ਚੌਹਾਨ ਦੇ ਸ਼ੁਰੂਆਤੀ ਸਾਲਾਂ ਨੂੰ ਜੀਵੰਤ ਕਰਦਾ ਹੈ। ਉਸ ਦੇ ਚਰਿੱਤਰ, ਹਿੰਮਤ ਅਤੇ ਲੀਡਰਸ਼ਿਪ ਹੁਨਰਾਂ ਦੀ ਡੂੰਘਾਈ ਨਾਲ ਪੜਚੋਲ ਕਰਦਾ ਹੈ। ਸ਼ੋਅ ਦੀ ਆਤਮਾ ਇੱਕ ਪਿਤਾ ਅਤੇ ਪੁੱਤਰ ਵਿਚਕਾਰ ਭਾਵਨਾਤਮਕ ਬੰਧਨ ਹੈ ਜੋ ਕਿ ਇਸ ਗਾਥਾ ਦੀ ਮੁੱਖ ਭਾਵਨਾ ਨੂੰ ਦਰਸਾਉਂਦਾ ਹੈ।
ਰਾਜਾ ਸੋਮੇਸ਼ਵਰ, ਪ੍ਰਿਥਵੀਰਾਜ ਚੌਹਾਨ ਦੇ ਪਿਤਾ ਦੀ ਭੂਮਿਕਾ ਨਿਭਾਉਂਦੇ ਹੋਏ, ਅਨੁਭਵੀ ਅਦਾਕਾਰ ਰੋਨਿਤ ਰਾਏ ਕਿਰਦਾਰ ਵਿੱਚ ਗਹਿਰਾਈ ਲਿਆਉਂਦਾ ਹੈ। ਰਾਜਾ ਸੋਮੇਸ਼ਵਰ ਬਹੁਤ ਸਿਆਣਾ, ਮਾਣਮੱਤਾ ਅਤੇ ਸ਼ਕਤੀਸ਼ਾਲੀ ਸ਼ਾਸਕ ਹੈ, ਪਰ ਇੱਕ ਪਿਤਾ ਦੇ ਰੂਪ ਵਿੱਚ ਉਹ ਸੰਵੇਦਨਸ਼ੀਲ ਅਤੇ ਆਪਣੇ ਪੁੱਤਰ ’ਤੇ ਮਾਣ ਕਰਦਾ ਹੈ। ਰੋਨਿਤ ਦਾ ਪ੍ਰਦਰਸ਼ਨ ਸ਼ੋਅ ਵਿੱਚ ਰੂਹ ਭਰ ਰਿਹਾ ਹੈ, ਜਿਸ ਨਾਲ ਕਿਰਦਾਰ ਸਿਰਫ਼ ਇੱਕ ਸ਼ਾਸਕ ਹੀ ਨਹੀਂ ਸਗੋਂ ਭਾਵਨਾਤਮਕ ਤੌਰ ’ਤੇ ਨਾਲ ਜੁੜੇ ਹੋਏ ਪਿਤਾ ਨੂੰ ਵੀ ਦਿਖਾਉਂਦਾ ਹੈ।
ਆਪਣੀ ਭੂਮਿਕਾ ਬਾਰੇ ਰੋਨਿਤ ਰਾਏ ਨੇ ਕਿਹਾ, ‘‘ਰਾਜਾ ਸੋਮੇਸ਼ਵਰ ਦਾ ਕਿਰਦਾਰ ਨਿਭਾਉਣਾ ਅਸਲ ਜ਼ਿੰਦਗੀ ਵਿੱਚ ਪਿਤਾ ਹੋਣ ਤੋਂ ਬਹੁਤ ਵੱਖਰਾ ਨਹੀਂ ਸੀ। ਉਹ ਸਿਰਫ਼ ਇੱਕ ਰਾਜਾ ਨਹੀਂ ਹੈ- ਉਹ ਇੱਕ ਪਿਤਾ ਹੈ ਜੋ ਆਪਣੇ ਪੁੱਤਰ ਲਈ ਸਭ ਤੋਂ ਵਧੀਆ ਚਾਹੁੰਦਾ ਹੈ। ਇੱਕ ਪਿਤਾ ਹੋਣ ਦੇ ਨਾਤੇ, ਮੈਨੂੰ ਭਾਵਨਾਵਾਂ ਦੀ ਕਲਪਨਾ ਕਰਨ ਦੀ ਜ਼ਰੂਰਤ ਨਹੀਂ ਸੀ ਕਿਉਂਕਿ ਮੈਂ ਉਨ੍ਹਾਂ ਨੂੰ ਮਹਿਸੂਸ ਕਰ ਸਕਦਾ ਸੀ। ਮਾਣ, ਚਿੰਤਾ ਅਤੇ ਉਮੀਦ, ਇਹ ਸਭ ਕੁਦਰਤੀ ਤੌਰ ’ਤੇ ਆਇਆ। ਭਾਵੇਂ ਇਹ ਕਹਾਣੀ ਇੱਕ ਇਤਿਹਾਸਕ ਪਿਛੋਕੜ ਵਿੱਚ ਸੈੱਟ ਕੀਤੀ ਗਈ ਹੈ, ਪਰ ਪਿਤਾ-ਪੁੱਤਰ ਦਾ ਰਿਸ਼ਤਾ ਸਦੀਵੀ ਹੈ। ਹਰ ਪਿਤਾ ਆਪਣੇ ਬੱਚੇ ਦੀ ਤਾਕਤ ਵਿੱਚ ਆਪਣਾ ਇੱਕ ਹਿੱਸਾ ਦੇਖਦਾ ਹੈ ਅਤੇ ਮੈਂ ਉਸੇ ਭਾਵਨਾ ਨੂੰ ਪਰਦੇ ’ਤੇ ਲਿਆਉਣ ਦੀ ਕੋਸ਼ਿਸ਼ ਕੀਤੀ ਹੈ। ਮੈਨੂੰ ਉਮੀਦ ਹੈ ਕਿ ਦਰਸ਼ਕ ਵੀ ਮੈਨੂੰ ਇਸ ਕਿਰਦਾਰ ਨੂੰ ਨਿਭਾਉਂਦੇ ਹੋਏ ਮੇਰੀਆਂ ਭਾਵਨਾਵਾਂ ਦੀ ਡੂੰਘਾਈ ਨੂੰ ਮਹਿਸੂਸ ਕਰਨ ਦੇ ਯੋਗ ਹੋਣਗੇ। ਇਸ ਕਿਰਦਾਰ ਰਾਹੀਂ, ਮੈਂ ਨਾ ਸਿਰਫ਼ ਇਤਿਹਾਸ ਨਾਲ, ਸਗੋਂ ਮਨੁੱਖੀ ਭਾਵਨਾਵਾਂ ਨਾਲ ਵੀ ਜੁੜਨ ਦੇ ਯੋਗ ਹੋਇਆ ਹਾਂ।’’
ਕਮਲਿਕਾ ਗੁਹਾ ਦੀ ਟੀਵੀ ’ਤੇ ਵਾਪਸੀ
ਕਮਲਿਕਾ ਗੁਹਾ ਠਾਕੁਰਤਾ ਜ਼ੀ ਟੀਵੀ ਦੇ ਨਵੇਂ ਸ਼ੋਅ ‘ਸਰੂ’ ਵਿੱਚ ਬਹੁਤ ਮਜ਼ਬੂਤ ਅਤੇ ਮਹੱਤਵਪੂਰਨ ਭੂਮਿਕਾ ਨਾਲ ਛੋਟੇ ਪਰਦੇ ’ਤੇ ਵਾਪਸ ਆ ਗਈ ਹੈ। ਉਹ ਕਾਮਿਨੀ ਦੇਵੀ ਦੀ ਭੂਮਿਕਾ ਨਿਭਾਅ ਰਹੀ ਹੈ, ਜਿਸ ਨੂੰ ਪਿਆਰ ਨਾਲ ਕਾਮਿਨੀ ਨਾਨੀ ਕਿਹਾ ਜਾਂਦਾ ਹੈ। ਉਹ ਨਾ ਸਿਰਫ਼ ਚਲਾਕ ਅਤੇ ਅਕਾਂਖਿਆਵਾਦੀ ਹੈ, ਸਗੋਂ ਤਾਕਤ ਅਤੇ ਦੌਲਤ ਹਾਸਲ ਕਰਨ ਲਈ ਕਿਸੇ ਵੀ ਹੱਦ ਤੱਕ ਜਾ ਸਕਦੀ ਹੈ। ਉਹ ਅਨਿਕਾ (ਅਨੁਸ਼ਕਾ ਮਾਰਚੰਡੇ) ਦੀ ਨਾਨੀ ਹੈ ਅਤੇ ਉਸ ਦੀਆਂ ਨਜ਼ਰਾਂ ਅੰਨਪੂਰਨਾ ਹਵੇਲੀ ਦੀ ਵਿਰਾਸਤ ’ਤੇ ਟਿਕੀਆਂ ਹੋਈਆਂ ਹਨ। ਆਪਣੀ ਦੋਹਤੀ ਅਨਿਕਾ ਵਾਂਗ, ਕਾਮਿਨੀ ਨਾਨੀ ਆਪਣੇ ਟੀਚੇ ਨੂੰ ਪ੍ਰਾਪਤ ਕਰਨ ਲਈ ਕਿਸੇ ਵੀ ਹੱਦ ਤੱਕ ਜਾ ਸਕਦੀ ਹੈ, ਭਾਵੇਂ ਇਹ ਝੂਠ ਬੋਲਣਾ, ਧੋਖਾ ਦੇਣਾ ਜਾਂ ਕਿਸੇ ਨੂੰ ਮਾਰਨਾ ਹੋਵੇ।

ਆਪਣੇ ਕਿਰਦਾਰ ਬਾਰੇ ਗੱਲ ਕਰਦਿਆਂ ਕਮਲਿਕਾ ਗੁਹਾ ਠਾਕੁਰਤਾ ਨੇ ਕਿਹਾ, ‘‘ਸਰੂ’ ਵਰਗੇ ਪ੍ਰੇਰਨਾਦਾਇਕ ਸ਼ੋਅ ਵਿੱਚ ਕਾਮਿਨੀ ਦਾ ਕਿਰਦਾਰ ਨਿਭਾਉਣਾ ਮੇਰੇ ਲਈ ਬਹੁਤ ਖ਼ਾਸ ਹੈ। ਕਾਮਿਨੀ ਬਹੁਤ ਚਲਾਕ ਅਤੇ ਖ਼ਤਰਨਾਕ ਹੈ ਅਤੇ ਉਹ ਹਮੇਸ਼ਾਂ ਪੰਜ ਕਦਮ ਅੱਗੇ ਸੋਚਦੀ ਹੈ। ਮੈਂ ਪਹਿਲਾਂ ਵੀ ਕਈ ਮਜ਼ਬੂਤ ਭੂਮਿਕਾਵਾਂ ਨਿਭਾਈਆਂ ਹਨ, ਪਰ ਕਾਮਿਨੀ ਬਿਲਕੁਲ ਵੱਖਰੀ ਹੈ। ਉਸ ਦੀ ਦ੍ਰਿੜਤਾ ਅਤੇ ਨਿਡਰ ਸੋਚ ਨੇ ਮੈਨੂੰ ਤੁਰੰਤ ਉਸ ਵੱਲ ਆਕਰਸ਼ਿਤ ਕੀਤਾ।’’
‘‘ਉਹ ਸਰੂ ਦੇ ਰਾਹ ਵਿੱਚ ਸਭ ਤੋਂ ਵੱਡੀ ਰੁਕਾਵਟ ਹੈ ਅਤੇ ਉਸ ਦੀ ਮੌਜੂਦਗੀ ਕਹਾਣੀ ਵਿੱਚ ਇੱਕ ਵੱਖਰਾ ਰੁਮਾਂਚ ਜੋੜਦੀ ਹੈ। ਇੱਕ ਅਦਾਕਾਰ ਦੇ ਤੌਰ ’ਤੇ ਅਜਿਹੇ ਕਿਰਦਾਰ ਮਿਲਣਾ ਬਹੁਤ ਘੱਟ ਹੁੰਦਾ ਹੈ ਜਿਸ ਵਿੱਚ ਤੁਹਾਨੂੰ ਮਨੁੱਖੀ ਸੁਭਾਅ ਦੇ ਸਭ ਤੋਂ ਗੁੰਝਲਦਾਰ ਰੰਗਾਂ ਨੂੰ ਨਿਭਾਉਣ ਦਾ ਮੌਕਾ ਮਿਲਦਾ ਹੈ। ਉਸ ਦੇ ਮਨ ਦੀ ਚਲਾਕੀ ਨੂੰ ਸਮਝਣਾ ਅਤੇ ਉਸ ਨੂੰ ਨਿਭਾਉਣਾ ਮੇਰੇ ਲਈ ਨਵਾਂ ਅਨੁਭਵ ਹੈ। ਹੁਣ ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਦਰਸ਼ਕ ਇਸ ਕਿਰਦਾਰ ਨੂੰ ਕਿਵੇਂ ਸਵੀਕਾਰ ਕਰਦੇ ਹਨ।’’
ਆ ਰਿਹਾ ਹੈ ‘ਸੁਪਰ ਡਾਂਸਰ ਚੈਪਟਰ 5’
ਸੋਨੀ ਐਂਟਰਟੇਨਮੈਂਟ ਟੈਲੀਵਿਜ਼ਨ ਦਾ ਮਸ਼ਹੂਰ ਡਾਂਸ ਰਿਐਲਿਟੀ ਸ਼ੋਅ ‘ਸੁਪਰ ਡਾਂਸਰ’ ਆਪਣੇ ਪੰਜਵੇਂ ਸੀਜ਼ਨ ਨਾਲ ਵਾਪਸੀ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹੈ। ਇਸ ਵਾਰ ਅਸਾਧਾਰਨ ਪ੍ਰਤਿਭਾ ਨਾਲ ਭਰਪੂਰ 12 ਨੌਜਵਾਨ ਪ੍ਰਤੀਯੋਗੀ ਸਟੇਜ ’ਤੇ ਉਤਰਨਗੇ, ਜਿਨ੍ਹਾਂ ਨੂੰ ਦੇਸ਼ ਭਰ ਦੇ 12 ਮਸ਼ਹੂਰ ਕੋਰਿਓਗ੍ਰਾਫਰਾਂ ਦੁਆਰਾ ਉਨ੍ਹਾਂ ਦੀ ਪ੍ਰਤਿਭਾ ਅਤੇ ਪ੍ਰਸਿੱਧੀ ਦੇ ਆਧਾਰ ’ਤੇ ਚੁਣਿਆ ਗਿਆ ਹੈ। ਹਰੇਕ ਪ੍ਰਤੀਯੋਗੀ ਨੂੰ ਇੱਕ ਨਿੱਜੀ ‘ਗੁਰੂ’ ਜਾਂ ‘ਉਸਤਾਦ’ ਨਾਲ ਜੋੜਿਆ ਜਾਵੇਗਾ ਜੋ ਉਨ੍ਹਾਂ ਦੀ ਕਲਾ ਨੂੰ ਨਿਖਾਰਨ ਵਿੱਚ ਉਨ੍ਹਾਂ ਦਾ ਮਾਰਗਦਰਸ਼ਨ ਕਰੇਗਾ।

ਇਸ ਸ਼ੋਅ ਦੇ ਜੱਜਾਂ ਵਿੱਚ ਸ਼ਾਮਲ ਹਨ-ਸ਼ਿਲਪਾ ਸ਼ੈੱਟੀ ਕੁੰਦਰਾ, ਗੀਤਾ ਮਾਂ ਉਰਫ਼ ਗੀਤਾ ਕਪੂਰ ਅਤੇ ਪ੍ਰਸਿੱਧ ਕੋਰਿਓਗ੍ਰਾਫਰ ਮਰਜ਼ੀ ਪੇਸਟੋਂਜੀ, ਜੋ ਸ਼ੋਅ ਵਿੱਚ ਇੱਕ ਨਵੀਂ ਊਰਜਾ ਭਰਨਗੇ। ਇਹ ਤਿੱਕੜੀ ਸ਼ੋਅ ’ਤੇ ਹਰੇਕ ਕਲਾਕਾਰ ਦੇ ਸਫ਼ਰ ਨੂੰ ਸ਼ਾਨਦਾਰ ਬਣਾਉਣਗੇ। ਆਪਣੀ ਮਜ਼ੇਦਾਰ ਅਤੇ ਵਿਲੱਖਣ ਹੋਸਟਿੰਗ ਲਈ ਜਾਣਿਆ ਜਾਂਦਾ ਪਰਿਤੋਸ਼ ਤ੍ਰਿਪਾਠੀ ਇਸ ਸੀਜ਼ਨ ਨੂੰ ਇੱਕ ਵਾਰ ਫਿਰ ਹੋਸਟ ਕਰਦਾ ਨਜ਼ਰ ਆਵੇਗਾ।
ਸ਼ੋਅ ਬਾਰੇ ਸ਼ਿਲਪਾ ਸ਼ੈੱਟੀ ਕੁੰਦਰਾ ਨੇ ਕਿਹਾ, ‘‘ਹਰ ਮਾਂ ਦਾ ਸੁਪਨਾ ਹੁੰਦਾ ਹੈ ਕਿ ਉਹ ਆਪਣੇ ਬੱਚੇ ਨੂੰ ਤਰੱਕੀ ਕਰਦਾ ਦੇਖੇ। ਇੱਕ ਮਾਂ ਹੋਣ ਦੇ ਨਾਤੇ, ਮੈਂ ਜਾਣਦੀ ਹਾਂ ਕਿ ਹਰ ਮਾਂ ਆਪਣੇ ਬੱਚੇ ਲਈ ਕਿੰਨਾ ਪਿਆਰ ਅਤੇ ਕੁਰਬਾਨੀਆਂ ਕਰਦੀ ਹੈ। ਇੱਕ ਜੱਜ ਹੋਣ ਦੇ ਨਾਤੇ, ਮੈਂ ਹਮੇਸ਼ਾਂ ਅਜਿਹੇ ਪ੍ਰਦਰਸ਼ਨ ਦੇਖਣਾ ਚਾਹੁੰਦੀ ਹਾਂ ਜੋ ਤਕਨੀਕ ਦੇ ਨਾਲ-ਨਾਲ ਮੇਰੀ ਰੂਹ ਨੂੰ ਛੂਹ ਲੈਣ। ਮੈਂ ਇਸ ਨਵੇਂ ਸੀਜ਼ਨ ਦੀ ਬੇਸਬਰੀ ਨਾਲ ਉਡੀਕ ਕਰ ਰਹੀ ਹਾਂ। ਮੈਂ ਸਾਰੇ ਸੁਪਰਸਟਾਰਾਂ ਨੂੰ ਉਨ੍ਹਾਂ ਦੀਆਂ ਅਸਾਧਾਰਨ ਮਾਵਾਂ ਨਾਲ ਦੇਖਣਾ ਚਾਹੁੰਦੀ ਹਾਂ।’’
ਸ਼ੋਅ ਬਾਰੇ ਗੀਤਾ ਕਪੂਰ ਨੇ ਕਿਹਾ, ‘‘ਇਹ ਸੀਜ਼ਨ ਇੱਕ ਕਦਮ ਹੋਰ ਅੱਗੇ ਜਾਂਦਾ ਹੈ ਅਤੇ ਮਾਂ ਅਤੇ ਬੱਚੇ ਦੇ ਪਵਿੱਤਰ ਬੰਧਨ ਨੂੰ ਉਜਾਗਰ ਕਰਦਾ ਹੈ। ਹਰੇਕ ਪ੍ਰਤੀਯੋਗੀ ਜੋ ਪਹਿਲਾਂ ਹੀ ਸੋਸ਼ਲ ਮੀਡੀਆ ’ਤੇ ਬਹੁਤ ਮਸ਼ਹੂਰ ਹੈ, ਮੌਲਿਕਤਾ, ਨਿਡਰ ਪ੍ਰਯੋਗ ਲਿਆਏਗਾ ਅਤੇ ਹਰ ਵਿਚਾਰ ਨੂੰ ਇੱਕ ਪ੍ਰਦਰਸ਼ਨ ਵਿੱਚ ਬਦਲ ਦੇਵੇਗਾ ਜੋ ਦਰਸ਼ਕਾਂ ਨੂੰ ਮੋਹਿਤ ਕਰੇਗਾ। ਮੈਂ ਇਨ੍ਹਾਂ ਸਾਰੇ ਪ੍ਰਤਿਭਾਸ਼ਾਲੀ ਬੱਚਿਆਂ ਨਾਲ ਜੁੜਨ ਲਈ ਬਹੁਤ ਉਤਸ਼ਾਹਿਤ ਹਾਂ।’’
ਸ਼ੋਅ ਬਾਰੇ ਗੱਲ ਕਰਦੇ ਹੋਏ, ਮਰਜ਼ੀ ਪੇਸਟੋਂਜੀ ਨੇ ਕਿਹਾ, ‘‘ਮੈਂ ਪਹਿਲਾਂ ਵੀ ਕਈ ਵਾਰ ‘ਸੁਪਰ ਡਾਂਸਰ’ ’ਤੇ ਮਹਿਮਾਨ ਰਿਹਾ ਹਾਂ। ਹਰ ਵਾਰ, ਇਨ੍ਹਾਂ ਬੱਚਿਆਂ ਦੀ ਪ੍ਰਤਿਭਾ, ਊਰਜਾ ਅਤੇ ਜਨੂੰਨ ਨੇ ਮੈਨੂੰ ਹੈਰਾਨ ਕੀਤਾ ਹੈ। ਪਰ ਇਸ ਵਾਰ ਜੱਜ ਵਜੋਂ ਸ਼ਾਮਲ ਹੋਣਾ ਮੇਰੇ ਲਈ ਇੱਕ ਬਹੁਤ ਹੀ ਖ਼ਾਸ ਅਤੇ ਭਾਵਨਾਤਮਕ ਅਨੁਭਵ ਹੈ।’’