ਅੰਬਾਲਾ ’ਚ ਹਵਾਈ ਹਮਲੇ ਦੇ ਅਲਰਟ ਮਗਰੋਂ ਵੱਜੇ ਸਾਇਰਨ

ਨਿੱਜੀ ਪੱਤਰ ਪ੍ਰੇਰਕ
ਅੰਬਾਲਾ, 9 ਮਈ

ਅੰਬਾਲਾ ਵਿੱਚ ਹਵਾਈ ਹਮਲੇ ਅਟੈਕ ਦਾ ਅਲਰਟ ਜਾਰੀ ਕੀਤਾ ਗਿਆ ਹੈ। ਇੱਥੇ ਸਵੇਰੇ 10 ਵਜੇ ਲਗਾਤਾਰ 48 ਮਿੰਟਾਂ ਤੱਕ ਸਾਇਰਨ ਵੱਜਦੇ ਰਹੇ। ਇਸ ਦੌਰਾਨ ਤੁਰੰਤ ਸਾਰੇ ਸਕੂਲਾਂ ਅਤੇ ਕਾਲਜਾਂ ਵਿਚ ਛੁੱਟੀ ਦਾ ਐਲਾਨ ਕਰ ਦਿੱਤਾ ਗਿਆ। ਅੰਬਾਲਾ ਦੇ ਡਿਪਟੀ ਕਮਿਸ਼ਨਰ ਅਜੈ ਸਿੰਘ ਤੋਮਰ ਨੇ ਨੇ ਕਿਹਾ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਹੌਟਲਾਈਨ ਰਾਹੀਂ ਫੌਜ ਨਾਲ ਜੁੜਿਆ ਹੋਇਆ ਹੈ। ਅੰਬਾਲਾ ਤੋਂ 70 ਕਿਲੋਮੀਟਰ ਦੂਰ ਹਵਾਈ ਸੈਨਾ ਵੱਲੋਂ ਇੱਕ ਡਰੋਨ ਦਾ ਪਤਾ ਲਾਉਣ ਤੋਂ ਬਾਅਦ ਹਵਾਈ ਸੈਨਾ ਦੇ ਅਧਿਕਾਰੀਆਂ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਦੱਸਿਆ ਸੀ ਕਿ ਡਰੋਨ ਅੰਬਾਲਾ ਵੱਲ ਆ ਸਕਦਾ ਹੈ। ਡਰੋਨ ਦੇ ਆਉਣ ਦੀ ਸੂਚਨਾ ਮਿਲਣ ਤੋਂ ਬਾਅਦ ਸਵੇਰੇ 10.20 ਵਜੇ ਸਾਇਰਨ ਵਜਾਏ ਗਏ। ਬਾਅਦ ਵਿੱਚ ਫੌਜੀ ਅਧਿਕਾਰੀਆਂ ਤੋਂ ਜਾਣਕਾਰੀ ਮਿਲੀ ਕਿ ਡਰੋਨ ਅੰਬਾਲਾ ਵੱਲ ਨਹੀਂ ਆਵੇਗਾ ਜਿਸ ਤੋਂ ਬਾਅਦ ਸਾਇਰਨ ਬੰਦ ਕਰ ਦਿੱਤੇ ਗਏ। ਅੱਜ ਦੁਪਹਿਰ ਦੋ ਵਜੇ ਦੇ ਕਰੀਬ ਅੰਬਾਲਾ ਵਿਚ ਜ਼ੋਰਦਾਰ ਧਮਾਕਾ ਹੋਇਆ ਜਿਸ ਦੀ ਅਵਾਜ਼ ਨਾਲ ਲੋਕ ਡਰ ਗਏ। ਇਸ ਨਾਲ ਖਿੜਕੀਆਂ ਹਿੱਲ ਗਈਆਂ ਅਤੇ ਲੋਕ ਘਰਾਂ ਤੋਂ ਬਾਹਰ ਆ ਗਏ। ਡੀਸੀ ਨੇ ਕਿਹਾ ਕਿ ਜਹਾਜ਼ ਦੇ ਧੁਨੀ ਰੁਕਾਵਟ ਕਾਰਨ ਸੋਨਿਕ ਬੂਮ ਪੈਦਾ ਹੋਇਆ ਸੀ। ਸੋਨਿਕ ਬੂਮ ਕਾਰਨ ਹੋਇਆ ਧਮਾਕਾ ਇੰਨਾ ਸ਼ਕਤੀਸ਼ਾਲੀ ਸੀ ਕਿ ਘਰਾਂ ਅਤੇ ਇਮਾਰਤਾਂ ਦੀਆਂ ਖਿੜਕੀਆਂ ਕੁਝ ਦੂਰੀ ਤੱਕ ਹਿੱਲ ਗਈਆਂ।

ਏਅਰਫੋਰਸ ਬੇਸ ਵੱਲ ਜਾਣ ਵਾਲੀ ਸੜਕ ਬੰਦ

ਅੰਬਾਲਾ ਕੈਂਟ ਵਿਚ ਏਅਰ ਫੋਰਸ ਬੇਸ ਵੱਲ ਜਾਣ ਵਾਲੀ ਸੜਕ ਬੰਦ ਕਰ ਕਰਕੇ ਪੁਲੀਸ ਫੋਰਸ ਤਾਇਨਾਤ ਕਰ ਦਿੱਤੀ ਗਈ ਹੈ ਜਦੋਂ ਕਿ ਪਹਿਲਾਂ ਇਹ ਸੜਕ ਗੱਡੀਆਂ ਲਈ ਬੰਦ ਕੀਤੀ ਗਈ ਸੀ। ਬਾਹਰੋਂ ਆਉਣ ਵਾਲੇ ਵਾਹਨ ਜਾਂਚ ਤੋਂ ਬਾਅਦ ਹੀ ਅੰਬਾਲਾ ਵਿਚ ਦਾਖਲ ਹੋਣ ਦਿੱਤੇ ਜਾ ਰਹੇ ਹਨ। ਬੱਸ ਅੱਡੇ, ਹੋਟਲਾਂ, ਸਰਾਂਵਾਂ ਆਦਿ ਵਿਚ ਸ਼ੱਕੀ ਵਿਅਕਤੀਆਂ ਤੇ ਨਜ਼ਰ ਰੱਖੀ ਜਾ ਰਹੀ ਹੈ।